BASAZOHLALA ABAQEQESHI BE-CHIEFS KULE SIZINI.
UKAIZER Motaung Jnr ucacisa ngeyabaqeqeshi beKaizer Chiefs abaphikwa imiphumela.
ISITHOMBE : Kaizer Chiefs
MALIBONGWE MAZIBUKO
UMQONDISI Wezebhola kwiKaizer Chiefs, uKaizer Motaung Junior, usegcizelele ukuthi imiphumela kumele iqale ukubonakala ngokushesha njengoba inhloso enkulu ethimbeni labaqeqeshi bamanje kusewukuthi iqembu likwazi ukuqeda isizini lisendaweni ezolingenisa kuCAF Champions League.
IChiefs ibhekene nobunzima njengoba isihlulwe imidlalo emihlanu kweyisithupha edlule kuyo yonke imiqhudelwano. Lokhu kuholele ekutheni Amakhosi aphume kwiCAF Confederation Cup, akhishwa kwiNedbank Cup, kanti amathuba okubangq isicoco seBetway Premiership kule sizini nawo abonakala esekude.
Ngenxa yale miphumela emibi, kubikwa ukuthi abalandeli abaningi sebefuna ukuthi labaqeqeshi ababambile, uCedric Kaze noKhalil Ben Youssef, basuswe ezikhundleni zabo. Abanye abalandeli baphinde bagcizelela ukuthi iqembu kumele liqale ukuhlelela kahle isizini ka-2026/27.
Nokho, uMotaung Junior, ekhuluma neKaizer Chiefs Radio ngoLwesihlanu ntambama, kubikwa ukuthi uveze ukuthi kunenhloso ecacile ebekelwe laba baqeqeshi selokhu bathatha izintambo ngemuva kokuhlukana ngokuvumelana neqembu kowayengumqeqeshi uNasreddine Nabi.
UMotaung Junior uthe laba baqeqeshi bayakuqonda kahle ukuthi banomthwalo omkhulu futhi bayazi ukuthi imiphumela emihle kumele ifike ngokushesha.
Ngokwemibiko, iChiefs iqede isizini edlule isendaweni ye-10 kwi-log yeBetway Premiership ngesizini edlule kodwa yaqeda indlala yezindebe eyayisithathe iminyaka eyishumi ngokuwina iNedbank Cup. Lokho kwenze iqembu langena kwiCAF Confederation Cup, kodwa laphuma esigabeni samaqoqo ngenxa yokwehlulwa ngamagoli. Lokhu kusho ukuthi lingase liqede enye isizini lingakwazanga ukungena emqhudelwaneni weCAF.