ODILIKAJELE (6) KODLWENGULE ABESIFAZANE ABAYI-6

INKANTOLO yaseMzimkhulu ithole uTenes Hassan enecala lokudlwengula abesifazane abayisithupha, yase imigixabeza ngodilikajele abayisithupha.
ISITHOMBE: SAPS

OWAMI THABETHE

KUGIXABEZWE ngodilikajele abayisithupha uTenes Hassan oneminyaka eyi- 33 ubudala, kulandela ukutholakala enemacala okudlwengula abesifazane abayi-6, kusukela ngoMasingana noZibandlela 2022.

Lo mlisa ugwetshwe yuNkantolo yesiFunda Umzimkhulu, kuthiwa wayegqekeza ezindlini zabantu besifazane abahlala nezingane zabo.
Ube fika afune omakhalekhukhwini nemali ngaphambi kokubanukubeza ngokocansi, kanti lezi zigameko ubezenza ngezikhathi zasebusuku.

Abaseshi boPhiko lweKokstad Family Violence, Child Protection and Sexual Offences, baqoqe ubufakazi obuholele ekutheni uHassan axhunyaniswe nawo wonke lawa macala.

Okhulumela amaphoyisa KwaZulu-Natal, uColonel Robert Netshiunda, uthe phakathi kobunye bobufakazi obubalulekile obasetshenziswa bekukhona nobufakazi bolibofuze (DNA).

“Ubufakazi bolibofuzo busize abaphenyi ukuthi bahlanganise uHassan nawo wonke la macala, nokwenze kwashesha ukuphothulwa kwecala,” kusho uNetshiunda.
UHassan uphinde wagwetshwa iminyaka eyi-8 ejele ngecala lokugqekeza, futhi igama lakhe lizofakwa kwiNational Register for Sexual Offenders.