KUZOTHUTHUKISWA UMZILA WOMJAHO WE-10KM ETHEKWINI
ABAHLELI bomjaho iDURBAN International Marathon bazolungisa umzila okuzogijinywa kuwona ngempelasonto eThekwini.
ISITHOMBE: Durban International Marathon
MALIBONGWE MAZIBUKO
ABAHLELI bomjaho iDurban International Marathon sebememezele ukulungiswa komzila we-10km okuhloswe ngakho ukwenza lo mjaho wenzeke ngokushesha futhi uhambe kahle njengoba sekusondele usuku lwami.
Lokhu kumenyezelwe njengoba idolobha iTheku lizoba nomjaho kulelisonto, kanti izinkulungwane zabagijimi kulindeleke ukuthi zingene emigwaqeni ngeSonto, mhla zi-3 kuNhlaba 2026.
USihlalo weLocal Organizing Committee, uSteve Mkasi, uthe lolu shintsho luhlose ukubeka abagijimi phambili nokubasiza bagijime ngokuphephile.
UMkasi uthe ukuqala komjaho ku-M4 kuzonciphisa ukuminyana futhi kunikeze abagijimi ithuba lokuqala ngamandla njengoba lo mgwaqo uqondile futhi ulingene.
Ngokwezinhlelo ezintsha, umjaho we-10km uzoqala ku-M4, cishe ngamamitha angama-50 enyakatho komgwaqo uWalter Gilbert, abagijimi bebheke eningizimu.
Abahleli bathi ukusetshenziswa kwemizila ebanzi ye-M4 kusukela ekuqaleni kuzokhipha amajika anzima okuqala, okuzokwenza kube lula ukuhamba kwabantu abaningi nokwandisa amathuba okuthi kugijinywe izikhathi ezisheshayo
njengoba umzila uzophelela eMoses Mabhida Stadium ePeople’s Park.
Umjaho uzoqala ngo-06:30 ekuseni, kanti isikhathi sokuvala sizoba ngo-09:00 ekuseni.
Abagijimi banxuswa ukuthi basebenzise izindawo zokupaka nezokwehlisa abantu eziseMoses Mabhida Stadium kanye naseKings Park ukuze kube lula ukufinyelela endaweni entsha yokuqala ku-M4.