KUGIXABEZWA ABADAYISI BAKU-MANSEL NGEZINDAWO EZINESITHUNZI ZOKUSEBENZA

ITHEKU liqinisa ukweseka abadayisi abakuMansel Road Market ngeprojekthi entsha. ISITHOMBE: ETHEKWINI MUNICIPALITY

LINDELWA MAGWAZA

UMASIPALA weTheku wethule isigaba sokuqala seprojekthi yokuthuthukisa iMansel Road Market ebiza u-R29 million, wanikeza abadayisi baseChurch Walk izitolo ezintsha eziyi-100 ezinezicabha ezikhiyekayo, ugesi nezindlu zangasese.USihlalo weKomidi lezokuThuthukiswa koMnotho nokuHlelwa kweDolobha, uCllr Thembo Ntuli, uthe abadayisi basemgwaqeni baklama indima enkulu kumnotho weTheku futhi bayinsika ebalulekile, njengoba beseka izinkulungwane zemindeni futhi bedala amathuba emisebenzi.

“Ngokuthuthukisa iMansel Road Market sakha indawo ephephile nehloniphekile ezothuthukisa ukusebenza kwabadayisi, ibasize baqhubeke nokukhulisa amabhizinisi abo,” kusho uCllr Ntuli.UMqondisi Omkhulu woMnyango wezokuThuthukiswa koMnotho nokuHlelwa kweDolobha, uLihle Phewa, uthe isigaba sesibili sizokwengeza ezinye izitolo ezingama-86, okuzokwenza imakethe ikwazi ukwamukela abadayisi abayi-186.”Le phrojekthi isidale amathuba emisebenzi yesikhashana eyi-55 kubantu bendawo futhi yanikeza umsebenzi kosonkontileka abane bendawo,” kusho uPhewa.

Omunye wabadayisi, uMnuz Mboneni Qwabe, uthe izitolo ezintsha zizoguqula indlela abasebenza ngayo. “Ukuthola isitolo esinezicabha ezikhiyekayo, ugesi nezinsiza ezingcono kusho lukhulu kithi. Kusinika ukuphepha nesithunzi futhi kuzosisiza sikhulise amabhizinisi ethu,” kusho uMnuz Qwabe.UMasipala uphinde wanikeza izimvume zokuhweba ezingama-53 kubadayisi abaphumelele kulandela ukukhangiswa kwezitolo ebezingenamuntu.