KUZONGENELELA UNDUNANKULU WASE-KZN KOLWESITELEKA SAMATEKISI

UMBIKO: ZETHU PHOSWA

SEKUPHELE izinsuku eziyi-6 kuqhubeka isiteleka samatekisi ahamba amabanga amade.
Lokhu kuhlupheka nokuvaleleka kwabantu, sekuholele ekutheni uNdunankulu waKwaZulu-Natal uMnuz Thamisanqa Ntuli angenelele kulolu daba.

UNdunankulu uNtuli uzongenelela esiteleka samatekisi, njengoba kusasa kulindeleke ukuthi abenomhlangano nabanikazi bamatekisi iLong-Distance Association eMgungundlovu.

Isiteleka samatekisi amabanga amade aseDurban Station naseYMCA eThekwini, elibangise zindaweni ezifana naseRichards Bay, KwaNongoma, Mtubatuba, Newcastle, Swazilanda Lesotho, Gauteng nezinye izindawo, siqala ngeledlule ngoLwesihlanu.

Abanikazi bamatekisi angaphansi kwenhlangano iDurban Station Long-distance Association bakhala ngokuthathelwa izimoto zabo, abathi zithathwa amaphoyisa ngaphansi kwe-Oparation Shanela.
Abamatekisi ingcapha bayikhomba
kuMnyango wezokuThutha nezokuHlaliswa koMphakathi KwaZulu-Natal ohola uMnuz uSiboniso Duma ozobe eyingxenye yomhlangano wakusasa ngokunqaba nezimvumo zokusebenza.

UNdunankulu uNtuli uthi uyabona ukuthi lesi siteleka samatekisi sinomthelela omubi emphakathini nasesimeni somnotho wesifundazwe.

“Abantu baKwaZulu-Natal kumele babekwe phambili. Asikwazi ukuvumela ukuthi abantu abangaphezulu kuka-100 000 bathwale kanzima ngezokuthutha okumele zibafikise ezindaweni abaya kuzo,”kusho uNtuli.