UDLAMINI USIZA OSOMABHIZINISI ABASAFUFUSA
AKHONA DLAMINI
ISIKHULU sikaMasipala waBaQulusi, uSbonga Dlamini, sitheleka kungalindele muntu kusomabhizinisi osafufusa oziphilisa ngokufuya nokudayisa izinkukhu uThandazile Zulu waseNgilandi, eMondlo, kuWadi 21.
UDlamini ufike ephethe izinsiza ezizomelekelela ukuthuthukisa ibhizinisi okubalwa kuzo amatshwele, ukudla kwawo, izitsha zokuwaphakela nezithombo zokutshala.
“Kuyangijabulisa ukubona abesifazane abasebasha bezama ukuzimela ngokwezomnotho nokusiza imindeni yabo. Kubalulekile ukuthi abesifazane bazithuthukise ngokusungula amabhizinisi ukuze bakwazi ukuziphilisa futhi bagweme ukubhekana nezimo ezinzima ezidalwa ukuswela,” kubeka uDlamini.
UZulu uthe ibhizinisi lakhe usanda kulisungula, waqala ngokufuya amatshwele angama-20 ngenxa yokungabi nayo imali eyanele yokwandisa isibalo sezinkukhu. Uveze nokuthi izindleko zokuthenga ukudla kwezinkukhu ziphezulu, okwenza kube nzima ukukhulisa ibhizinisi.
“Ngithanda ukudlulisa ukubonga ngosizo engilutholile, impela luzongikhuthaza ukuthi ngiqhubeke nokusebenza kanzima ukuze ibhizinisi lami likhule futhi lingilethele inzuzo ethe xaxa,” esho.
