I-MAGESI FC ISINOMQEQESHI OMUSHA

UMBIKO: MABUNHLE XIMBA

I-MAGESI FC seyithule uJohn Maduka njengomqeqeshi wayo omusha ngaphambi kokuqala kwesizini ka 2025/26 yeBetway Premiership.

Leli qembu laseLimpopo lisanda kwethusa abaningi ngokudedela u-Owen da Gama oyisindise ezembeni ngesizini edlule.

UMaduka ubekade eqeqesha iRoyal AM exoshwe kwiPremier Soccer League ngenxa yezinkinga zezimali, eziholele ukuthi umphathi wayo uShawn Mkhize aboshwe abaqoqi bentela i-SA Revenue Services. Kulindeleke uMaduka asebenze noJacky Ledwaba njengomsizi wakhe.
Lo mlisa waseMalawi, owafika kuleli ezodlala kuMtata Bush Bucks, unesipiliyoni sokusebenza esigabeni esiphezulu njengoba eseke walolonga iBloemfontein Celtic neMaritzburg United. IMagesi FC isanda kukhulula inqwaba yabadlali okubalwa uGift Motupa, Neverdie Makhubela, Deolin Mekoa, Rhulani Manzini, Amos Mokwena, Boikanyo Komane, Maboke Matlakala, Anathi Ngwadla, Given Mashikinya noMenzi Ndwandwe. Ngesizini edlule yamangaza abaningi ngokugingqa izimfivilithi iMamelodi Sundowns kwifayinali yeCarling Knockout Cup ngo 2-1 kwifayinali eyayiseBloemfontein. Ngaleso sikhathi yayiphekwa uClinton Larsen owagcine echithwa ngenxa yokugqoza kwemiphumela emihle ngokuhamba kwesikhathi.