UBHEKWE NGABOMVU OWEZINKAKHA ZE-CHIEFS NE-PIRATES ETHEKWINI
IZINKAKHA zeKaizer Chiefs neOrlando Pirates zizobhekana kuLegends Derby eMoses Mabhida.
ISITHOMBE : Puzzle Pictures
MALIBONGWE MAZIBUKO
UBHEKWE ngabomvu umdlalo omkhulu, ozohlanganisa izinkakha zebhola laseNingizimu Afrika, ozobanjelwe eMoses Mabhida Stadium mhla zingama-29 kuNdasa 2026.
Lezi zinkakha eziyizimbangi ezakudala, ezizotholana phezulu kungenze-Orlando Pirates nezeKaizer Chiefs, emdlalweni obizwa nge-Legends Derby, ozoqala kugamengxe ihora lesithathu (15:30) ntambama, uzobuyisa inkumbulo yezikhathi ezinkulu zodumo kulo mbango, owaziwayo ebholeni laseNingizimu Afrika.
Abalandeli bazobona izinkakha ezake zakhazimula enkundleni futhi zibeke ibhola lakuleli kwibalazwe, zibuyela kumakhokho, njengoba iChiefs iqinisekise ukuthi kuzodlala abadlali abadala okubalwa u-Itumeleng Khune, uSimphiwe Tshabalala, uBernard Parker, uLebohang Manyama noSiyabonga Nomvethe.
I-Pirates nayo ibophele iqembu eliqinile okubalwa u-Edward Motale, uHappy Jele, uBenson Mhlongo, uLucky Lekgwathi, uJackson Mabokgwane, uMpho Makola,Sifiso Myeni, uLehlohonolo Majoro noKatlego Mashego.
Lo mdlalo uzohlanganisa abadlali abake bamela amaqembu abo ngenhlonipho, baletha izindondo nezikhathi zenjabulo eqenjini nakubalandeli.
Abahleli balo mcimbi bathi inhloso enkulu ukugubha umlando webhola, ukuhlanganisa abalandeli nokukhumbuza isizwe ngobukhulu bomdlalo phakathi kweChiefs nePirates, okungomunye wemidlalo emikhulu kakhulu ebholeni lase-Afrika.
Kulindeleke ukuthi abalandeli bagcwalise inkundla yaseMoses Mabhida.