KUBOSHWE OTHOLAKALE NEZIDAKAMIZWA EPHOENIX

IZINHLOBONHLOBO zezidakamizwa ezitholakale kumsolwa. ISITHOMBE: KZNSAPS

NOMCEBO NGEMA

UKHALELWE amasongo kaSigonyela owesilisa otholakale nezidakamizwa zenani lemali elinganiselwa ku-R400 000, izolo ePhoenix eThekwini.

Lo wesilisa uboshwe uphiko lwamaphoyisa akaSAPS Economic Infrastructure Task Team, iProvincial Drug and Firearm Unit, ne-Excellerate K9, ngesikhathi benza uphenyo e-Unit 2 ngaphansi kwencwadi yokusesha.Amaphoyisa avundulule amaphilisi eMandrax abiza cishe u-R20 000, athe uma eqhubeka nophenyo ezindlini eziseduze athola irock cocaine, amaphilisi e-Ecstasy, icocaine powder, iMandrax egayiwe nezinhlamvu zezibhamu.Umsolwa uboshwe, uzovela maduze enkantolo njengoba amaphoyisa esaqhubeka nokuphenya.