UPHETHE NGEGIYA ELIPHEZULU OWE-ARTICULATE AFRICA

INGXOXO yephaneli namuhla kowe-AA. ISITHOMBE: AKHONA DLAMINI

AKHONA DLAMINI

BEKUVUNGUZA umoya wenjabulo eDurban Exhibition Centre, njengoba bekuwusuku lokugcina lo mcimbi we-Articulate Africa.
Usuku lwanamuhla luvulwe ngengxoxo yephaneli iSugar And Spice ebeyishayelwa uZiphezinhle Zawadi ongumbhali wezincwadi, ibigxile kwizithandani zezinhlanga ezahlukahlukene.
Le phaneli beyibophele uBhekisisa Mncube wodumo lwencwadi iThe Love Diary Of A Zulu Boy, uFikile Simelane nowakwakhe uKyle Allen bencwadi i-28 Days Love Has No Colour nezithandani ezisencane uDaniel no- Ingrid Rose Chitombi.

Kule ngxoxo bebehluza izincwadi zabo baphinde bakhulume ngobunzima ababhekana nabo, ikakhulukazi emiphakathini nasemindenini.
“Mina ubaba wami wathi ngingamane ngithandane nomuntu onobulili obufana nobami, kunokuthi ngithandane nomuntu onebala elingafani nelami. Kumanje ngishadile ngize nginengane asikakhulumisani namanje nobaba wami,” kubeka u-Ingrid.

UMncube yena uthi ubunzima ayebhekana nabo, ukuthi unkosikazi wakhe onebala elimhlophe akayidli inyama, lokho kwakuholela ekutheni izinto zesintu ezidinga ukuthi kuhlatshwe zingenziwa.
“Unkosikazi wami akafune lutho oluyisihluku olwenziwa ezilwaneni, ngakho ke izinto zesintu ezidinga kuhlatshwe angisazenzi emzini wami,” esho.