INGENE NGEMBOBO YENALITI I-WANDERERS KOWE-MFC
UMBIKO: ZETHU PHOSWA
ISIGILE izimanga iMidlands Wanderers inqoba kowe-ABC Motsepe League National Play-offs, okuyikhuphulela kuMotsepe Foundation Championship (MFC) kulandela ukunqoba ngo 2-1 ihlula iThames Football Club (North-West), emdlalweni wokuhlungela indawo yesi-3 neyesine, eLucas Masterpieces Moripe Stadium, eTshwane.
IThames FC ihambe phambili ngesiwombe sokuqala, okuthe sezibuya ekhefini iWanderers yabuya isithelwe ngezibonkolo, yafika yagalela amabili enetheni.
Lokhu kuwina kweWanderers kwenze yakwazi ukubambelela kwiligi ukuze inyukele esigabeni sesibili seligi.
IWanderers ithwale kanzima okwenze kwaba umqansa ukufika kwiMFC, ithwale kanzima ngokuhlulwa emdlalweni wayo owandulela owamanqamu ngoMgqibelo kusihlwa.
IWanderers ilale endaweni yesi-3, njengoba amaqembu amathathu ahlezi phezulu kuma-play-offs azokhushulelwa ku-MFC.
Lawa kugcine kuyiGomora FC yase Gauteng, The Bees yase Mpumalanga nayo iWanderers.
Lokhu kuyizindaba ezinhle njengoba amathemba ebekade emakhulu ukuthi Abafana Bebatha bangene kwiNational First Division.
Umqeqeshi uVincent Myeni uzwakalisa ukuziqhenya nokwaneliseka ngempumelelo yeqembu, “Ukubambelela kumbono wethu wokuya kwiNFD nohlelo oluqinile lokuzilungiselela yikho okusibeke lapha. Sikhuluma nje nesizini ibisiphethe kahle sihlulwe umdlalo owodwa kuphela isizini yonke. Konke lokhu yizithelo zokubekezela.Okunye engingakuqhakambisa ukuthi kubalulekile ukuthuthukisa abadlali kwakheke iqembu elihle.”
ISITHOMBE: INQOLOBANE YE-MIDLANDS WANDERERS