KUZOLALWA ICACILE INQWELE EBAFANENI KWEYE-TOYOTA CUP
UMBIKO: MABUNHLE MLABA
Umusamedia1@gmail.com
LIYOTHI lishona ilanga kuzobe seyicacile inqwele ebafaneni, phakathi kweKaizer Chiefs ne-jani uma sekubhekenwe ne-Asante Kotoko yaseGhana kwiToyota Cup eMoses Mabhida Stadium namuhla ngo-15h00 ntambama.
Lo mdlalo obhekwe ngabomvu ukuthi izibabuli ezintsha zeKaizer Chiefs zizogadla kanjani.
Likhulu isasasa ngokuqala kwesizini entsha yakuleli kwazise iChiefs isonge edlule ngenothi eliphezulu inqoba indebe yeNedbank Cup ithela othulini izimbangi zeminyaka i-Orlando Pirates ngo 2-1.
Besekuphele iminyaka eyishumi ingabonwa nangokhalo indebe eNaturena kanti ukunqoba kwayo sekudale ithemba kubalandeli bayo ukuthi le sizini ezoqala kungenzeka kube eyenjabulo. Nezikhulu zayo zibukeke zigcine zizilalela izikhalo zabalandeli zokungena shi emakethe kuthengwe abadlali njengoba iChiefs ibalwa namaqembu ambalwa athenge abadlali abaningi abebedlala phesheya.
Ingakho umdlalo wakusasa ungeke uthathwe njengowobungani kwazise umphumela wawo uzogqamisa ukuthi iziphi izindawo ekumele izilungise ngaphambi kokuqala koshikishiki lwesizini yeBetway Premiership.
Ngaphambi kwalo mdlalo, abazohambela enkundleni bazobhema bakholwe njengoba bezoqala bazitike ngomculo onhlobonhlobo kunandisa abaculi abanjengoBig Zulu, DJ Tira nabanye. Kuzophinde kubukwe izinkakha zeChiefs ezizongcweka nezibizwa nge-Zulu Kingdom Legends. IChiefs izobe ibophele oDoctor Khumalo, Stanton Fredericks, Bhele Nomvethe nabanye kanti kwabase-KZN kuzobonakala oNtokozo Sikhakhane, Mvonqo Manqana noManqoba Mkhize.