KUSHAQWE IMPAHLA YEZITHANDANI NGENKOHLAKALO

I-SIU eshaqe impahla yabasolwa ababili KwaZulu-Natal ngokukhwabanisa izizumbulu ngonyaka ka-2020. ISITHOMBE: GOOGLE

NOMCEBO NGEMA

I-SPECIAL Investigating Unit (SIU) ishaqe impahla yabasolwa ababili, abasolwa ngokukhwabanisa izigidi ze-Covid 19 ze-UIF KwaZulu-Natal.
Laba basolwa okungu-Yolanda Mgobo nesinqandamathe sakhe uHlalanathi Mbangi, basolwa ngokuzuza izigidini zamarandi eziyamaniswa nezicelo zomgunyathi zemali yosizo lwe-Covid-19, ze-UIF besebenzisa inkampani iYoluleko Trading.

I-SIU ithi lolu daba luyingxenye yophenyo olukhulu lokukhwabanisa imali engango-R161 million, oluhlobene nohlelo lwe-Unemployment Insurance Fund Temporary Employer/Employee Relief Scheme (TERS), olwasungulwa ngesikhathi se-Covid-19 ngenhloso yokusiza abasebenzi, namabhizinisi ayebhekene nobunzima.

NgokweSIU ithi uMgobo wathola imali engaphezu kuka-R18.6 million kuma-accounts akhe as ebhange, nawenkampani evela kuhla lwezinkampanini ezixhunyaniswa nezicelo zomgunyathi ze-UIF.

Izimpahla ezishaqiwe zihlanganisa:

• IHyundai Tucson eyathengwa ngonyaka ka-2020
• IToyota Corolla ebhaliswe ngonyaka ka-2025
• IFord Ranger okuthiwa yadluliselwa kuMbangi ngonyaka ka-2023

I-SIU ithi iphinde yashaqa izindlu eziningana eziseSouth Coast, okubalwa kuzo izindlu eziseScottburgh nase-Uvongo. Abaphenyi bathi le mali yayidluliswa kwizinkampani ezihlukene, okubalwa kuzo iNakomang Trading Enterprise, Ezogu Trading kanye ne-Ezikamshalaza Trading.

Kuthiwa iNakomang Trading yathola cishe u-R19.2 million ku-UIF, i-Ezogu Trading zakhokhela uMgobo cishe u-R1.2 million, kwathi i-Ezikamshalaza Trading zamkhokhela imali ecishe engu-R1.7 million. I-SIU iqhube yathi ukukhwabanisa kwenziwa kusetshenziswa amagama abasebenzi abangekho ukuze kutholakale imali yosizo lweCovid-19 eyayisinxephezelo sabasenzi abathintekile.