INQUNYELWE UGWAYI KATIKI IBANGLADESH
ICC inqumele ugwayi katiki iBangladesh ngesinqumo sokuya kwi-T20 World Cup ka-2026 e-India.
ISITHOMBE : Al Jazeera
MALIBONGWE MAZIBUKO
Inhlangano eyengamele ikhilikithi emhlabeni i-International Cricket Council (ICC) isinike iBangladesh Cricket Board (BCB) olunye usuku lokugcina lokubonisana nohulumeni waseBangladesh ukuze kuthathwe isinqumo sokuthi iqembu lizoya yini eNdiya ukuyodlala iNdebe Yomhlaba ye-T20 ka-2026. Uma iBangladesh iqhubeka nokwenqaba ukuya e-India ngenxa yokukhathazeka ngezokuphepha, ibhodi le-ICC selinqume ukuthi lizothathelwa indawo yiScotland kulo mqhudelwano.
Lesi sinqumo sithathwe emhlanganweni webhodi le-ICC obubanjwe ngoLwesithathu, lapho iningi labaqondisi livotele ukuthi iBangladesh ithathelwe indawo uma bengasiguquli isinqumo sabo. Kubathintekayo abayi-15 abebekhona, kuzwakale ukuthi yiPakistan kuphela eseke isikhundla seBCB. Lo mhlangano ubizwe ngemuva kokuthi iPakistan Cricket Board (PCB) ibhalele i-ICC namanye amabhodi ngoLwesibili, iveza ukuthi iyaseseka isinqumo esithathwe yiBCB.
“Lesi sinqumo sithathwe ngemuva kokubheka zonke izibuyekezo nezilinganiso zokuphepha ezenziwe, okuhlanganisa nezibuyekezo ezizimele, zonke eziveze ukuthi azikho izinsongo ezibhekiswe kubadlali baseBangladesh, abezindaba, izikhulu kanye nabalandeli kunoma yiziphi izinkundla kwezizosingatha umqhudelwano e-India,” kusho i-ICC esitatimendeni esilandele umhlangano webhodi.