UMDLALO WEZIDUDLA UKHUZA IBUYA
MABUNHLE MLABA
UKHUZA ibuya ngenyanga ezayo umdlalo wasesiteji wezidudla iBigly Yugle osuzoshaya ngomlingisi omusha uMinenhle Sikhosana.
Lo mdlalo, owashiya abebewuthamele eThe South African State Theatre ekuqaleni konyaka bebheme bakholwa, uzokuba sePlayhouse Drama Theatre kusukela ngo September 12 kuya kumhla ka 13. Amathikithi abiza uR150 kanti akhona e-webticket.
Ngaphandle kukaMinenhle, oyi-social influencer nevamise ukubonakala kuTik Tok naku-Instagram nongena esikhaleni sikaBaby Cele, lo mdlalo ugabe ngabalingisi abamnkantshubomvu emidlalweni yeshashalazi nakumabonwakude. Laba uBongani Mbatha, uMduduzi Nombela, u-XD Dlamini noBhekani Shabalala.
Lo mdlalo, ogcine ukubukwa ngaphambi kokuhlasela kwe-Covid 19, uqondiswe uqweqwe lomlingisi uTony Kgoroge ozakhele igama emidlalweni okubalwa Zero Tolerance neHotel Rwanda kanti useke waqondisa imidlalo yasesiteji enohlonze njengeMooi Street Moves neWoza Albert.
Kulindeleke abazowuhambela baphume kubuhlungu izisu ngenxa yamahlaya azobe eqhululwa ilaba balingisi. Lo mdlalo uthinta ngqo isimo abantu abakhuluphele abaphathwa ngayo emphakathini njengoba bevamise ukucwaseka. Lokhu kuholela ekutheni abanye baze bazenyeze kanti abanye basebenzisa imali ukuzuza abakufunayo. Isibonelo u-XD Dlaminini odlala indawo kasomabhizinisi owushaya u-Absalom udiza ngemali ukuze azuze isipatsha sentokazi uCynthia osebenza njengo-cashier e-supermarket.
UBongani, osebonakale emidlalweni eminingi yakumabonwakude njengoZalo no-Amalanga Awafani, udlala indawo kaMambana. UMdu, osebuya kolingisa kwiMbewu:The Seed, udlala indawo kaFull Chicken kanti uBhekani, oseke wabonakala kuSibongile &The Dlaminis, udlala indawo kaQololomdlwane onguSihlalo weSiyabathutha Taxi Association. Ubhekene nesimo esinzima njengoba kubhidlika umshado wakhe.
Kumenywe izikole zaKwaZulu-Natal ngenhloso yokufundisa intsha ngomkhuba wokucwasa izidudla