UMDLALO OQHAKAMBISA UBUQHAWE BESILO U-CETSHWAYO KUSASA E-PLAYHOUSE
UMDLALO weshashalazi okhombisa ngobuqhawe beSilo uCetshwayo.
UMDLALO weKing Cetshwayo wangonyaka owedlule. IZITHOMBE:WUSHWINI PAN AFRICAN CENTRE
NOMCEBO NGEMA
UBHEKWE ngabomvu umdlalo weshashalazi obizwa ngeKing Cetshwayo The Musical, ozoqala kusasa, mhla ziyi-13 kuNdasa eThe Playhouse-Drama Theater.
Lo mdlalo ubhalwe waphinde waqondiswa zingqalabutho kwezobuciko uJerry Pooe, ongumsunguli weWushwini Pan African Centre.
Uthi lo mdlalo ucacisa kabanzi ngomlando nobuqhawe beSilo uCetshwayo, esabusa ngesikhathi esinzima KwaZulu, abelungu ababefike bahlala banethezeka kwelikaMthaniya, sebeqala ukushaya imithetho.
“Lo mdlalo utshengisa umlando onothile oqhakambisa ukunqoba kukaZulu enqoba amaNgisi, nakuba ayehlaselwa ngezulu lezandla. Impi yaseSandlwana yakhombisa ubuqhawe nakuba amangisi ayeseshise Ulundi lwangqongqa,”kuchaza uJerry Pooe.
Lo mdlalo ukhonjiswa minyaka yonke, bese uzungeza izifunda ngenhloso, yokuqhakambisa umlando. Lo mdlalo usuke watshengiswa kwezinye izifundazwe ngisho naphesheya kwezilwandle.
Lo mdlalo udlalwa bukhoma unothiswe ngomculo namahubo.
Uzoqala ukudlalwa ligamenxe ihora lesithupha ntambama njengoba uzokuba uthulwa ngokusemthethweni, bese uvuleleka kwizikole.