KUBUYE INDODANA YOLAHLEKO KWI-CHIPPA

UNOZINTI weChippa United, uStanley Nwabali, useqoke ukubuyela kuleli qembu emuva kwezinyanga elishiyile. ISITHOMBE: Football Pidgin

MALIBONGWE MAZIBUKO

UBUYELE kwiChippa United unozinti waseNigeria, uStanley Nwabali, owayilaxaza ngasekuqaleni konyaka, ngoba eyothungatha amadlelo aluhlaza.UNwabali, obevimbela iqembu lesizwe laseNigeria, iSuper Eagles, washiya iChilli sekusabalele ukuthi ufunwa ngamaqembu aseMzansi agijima kwiBetway Premiership nawase-Asia.

Nokho emuva kokuhlukana neChippa uthwale kanzima ukuthola elinye iqembu.Esitatimendeni esakhishwa yiChippa ngoFebhuwari 5, yezwakalisa ukudumala ngohlukana noNwabali owashaya into ecokeme evimbele iNigeria emqhudelwaneni i-Africa Cup of Nations (Afcon) e-Ivory Coast ngo-2023 befinyelela kowamanqamu.“IChippa United iyakuqinisekisa ukuthi uStanley Nwabali ucele ukukhululwa. Emuva kokucubungula, iqembu lisamukele isicelo sakhe,” yayifundeka kanje ingenye yesitatimende seChippa.

NgeSonto iChilli Boys, eside kunzima ezembeni ngesizini, imemezele ukuthi isibuyile indodana yolahleko eyafulathela iqembu ingukaputeni.“IChippa United Football Club iyakuthokozela ukwamukela uStanley Nwabali okhuza ibuya kwiChilli Boys. Emuva kokuhlaba ikhefu, uStanley Nwabali ubuyela e-Eastern Cape, futhi siyakuthokozela ukumamukela eqenjini. Isipiliyoni, ubuholi bakhe buzophinda bubaluleke eqenjini njengoba siqhubeka nokulungiselela ukuqala kwesizini ezayo,” sibhalee kanje isitatimende seChippa.

IChilli Boys eqeqeshwa nguBrandon Truter, izovula isizini yeBetway Premiership ngokubhekana neLamontville Golden Arrows eKing Zwelithini Stadium, eMlazi, ngo-Agasti 1.