KUHLAWULISWE AMALOLI ATHUTHA IZINTO EZINOBUNGOZI NGOKUNGAYIGCINI IMIGOMO

AMALOLI athwala izinto ezinobungozi. ISITHOMBE: ETHEKWINI MUNICIPALITY

AKHONA DLAMINI

UMASIPALA weTheku ngokubambisana noMnyango weziCishamlilo eThekwini, Amaphoyisa kaMasipala weTheku, Amaphoyisa oMgwaqo (RTI) neRoad Traffic Infringement Agency, bethule umkhankaso wokulwa nokungalandelwa kwemithetho kwizithuthi ezithutha izinto ezinobungozi. Lokhu kwenzeke ngemuva kokuthi kuhlawuliswe amaloli ayi-16, imali efinyelela kwizigidi ezingama-R102 500 zamarandi, ngophula imithetho yezokuphepha.

Bathi kuhlolwe amaloli ayi-201 athutha izinto ezinobungozi emahoreni ayisithupha. EMariannhill Toll Plaza kuhlolwe ayi-113, kwathi ayishumi atholakala enogcobho, akhokhiswa inhlawulo ebalelwa ku-R45 500. Kanti emgwaqeni uM7 kuhlolwe amaloli angama-88, kwabanjwa ayisithupha, akhokhiswa inhlawulo ebalelwa ku-R60 000. Ngesikhathi kuhlolwa, izikhulu ziphinde zaqinisekisa ukuthi amaloli anazo yini izitifiketi ezisemthethweni zokuthutha, imishini yokucisha umlilo isesimweni esifanele nokuthi yonke imigomo yokuphepha iyalandelwa.

IMenenja yezokuPhepha Kwezomlilo, uThembelihle Msibi, uthe inhloso yalolu hlelo ukuvikela impilo yabantu, nokunciphisa izingozi ezingadalwa ukuthuthwa kwezinto ezinobungozi ngendlela engahambisani nomthetho. “Ukuphepha kwezakhamuzi, abashayeli bezimoto, abahamba ngezinyawo kanye nabasebenzi bezinkampani ezithutha lezi zimpahla kuyinto esiyibeke eqhulwini, yingakho kuzoqhubeka imikhankaso yokuhlola izithuthi nokuqinisekisa ukuthi zinezitifiketi ezisemthethweni, zihambisana nayo yonke imigomo yokuphepha,” esho.

UMsibi uphinde waveza ukuthi ukuqhubeka kwale mikhankaso kunciphise kakhulu ukutholakala kwezitifiketi zomgunyathi zokuthutha izinto ezinobungozi, okuyinkomba yokuthi izinkampani sezithobela umthetho kakhulu kunakuqala.