UXABA UZOKWETHULA AMALOLI AMANZI NAMABHASI AMASHA

IMEYA yaseThekwini uCyril Xaba izokwethula izimoto ezintsha ezizothuthukisa ukuhlinzekwa kwezidingo kubahlali. ISITHOMBE: ETHEKWINI MUNICIPALITY

LINDELWA MAGWAZA

IMEYA yaseThekwini, uKhansela Cyril Xaba, izokwethula izimoto ezintsha ezingaphezu kuka-100 eCentrum Site, ngenhloso yokusheshisa ukuhlinzekwa kwezidingo kubahlali.

Lezi zimoto zibiza u-R298 million, zifaka amaloli amanzi ayi-35 namabhasi abagibeli ayi-57.Amaloli amanzi azosetshenziswa emiphakathini eyahlukene yasemakhaya, ukuze uMasipala ukwazi ukubhekana nezinselelo zokutholakala kwamanzi. UMasipala uthi lezi zimoto ezengeziwe zizokhuphula isibalo samaloli amanzi sibe ngaphezu kuka-350.

“Lezi zimoto ezengeziwe zizokhuphula isibalo samaloli amanzi kaMasipala sibe ngaphezu kuka-350,” kusho uMasipala.Amabhasi amasha angu-57 azothatha indawo yezimoto ezigugile, kanti ingxenye yawo izohlonyiswa ukuze ikwazi ukuthwala abantu abaphila nokukhubazeka. Lokhu kuhloswe ngakho ukwenza ezokuthutha zomphakathi zifinyeleleke kubantu abaningi.

UMasipala uthi ngonyaka odlule uthathe isinqumo sokufaka amaloli amanzi ngaphansi kwawo, ukuze unciphise ukuncika ezimotweni eziqashwa ezinkampanini ezizimele.“Ingxenye yamabhasi amasha izokwazi ukuthwala abantu abaphila nokukhubazeka,” kusho uMasipala.

Uthi lezi zimoto zizowandisa amandla okuphendula ezinkingeni zamanzi, ikakhulukazi emiphakathini yasemakhaya, futhi zithuthukise ukutholakala kwezithuthi kubahlali baseThekwini.