I-DURBAN FASHION FAIR IZOKUBA SEQOPHELENI ELIPHEZULU

UMCIMBI wokukhangisa ngengqephu owaziwa nge Durban Fashion Fair, uzosingathwa uMasipala weTheku. IZITHOMBE: ETHEKWINI MUNICIPALITY

AKHONA DLAMINI

KUZOBE kushiyana umshefezo kowengqephu iDurban Fashion Fair (DFF), ezokuba seeDurban Exhibition Centre,
kusukela mhlaka zinyi-16 kuya kumhlaka 18 kuMandulo.
Lo mcimbi obalwa nemicimbi emikhulu edonsa amehlo abantu basemazweni angaphandle, uhlelwe
uMasipala weTheku, kanti kulo nyaka uzokuba ugubha iminyaka eyi-15 wasungulwa.

I-DFF izothatha izinsuku ezintathu, ngaphansi kwesiqubulo esithi ‘Where Legacy Lives’.
Abahleli beDFF bathi , kuzoqhakambisa ukukhula komkhakha wemfashini eThekwini, uphinde ugxile kubasunguli bemfashini asebemnkantshubomvu nabasafufusa.

“Kuzokhonjiswa imisebenzi yabasunguli bemfashini abangama-84 kulezi zinsuku ezintathu. Abangama-20 abasafufusa banikwe ithuba ngaphansi kohlelo lokufundiswa nokuthuthukiswa lweDFF Class of 2026, ngenhloso yokuzikhangisa nokuthuthukisa umsebenzi wabo,” ngokusho kwabeDFF.

Bathi mhla ziyi-16 kuMandulo kuzobe kukhona abasiki bengqephu okubalwa uDineo Khumalo, uRepublic Menswear, uCarita Adams noByArthur The Tailor.

Kuthi ngomhlaka- 17 kuzobonakala iDFF Class of 2026, okubalwa uPrecious Lulu neHouse of St Luke.
Ngomhlaka 18 kuzobe sekukhonjiswa imisebenzi kaKing A Apparel, ekaKaren Monk, eka-Indoni Fashion House noDUKE Clothe Your Soul.
Umphakathi uyamenywa ukuthi uze uzosekela ithalente lemfashini laseThekwini.