UMASIPALA WABAQULUSI UCIJE INTSHA NGAMATHUBA OKUQALA AMABHIZINISI

IMEYA kaMasipala uCllr Sifiso Mkhwanazi ikhuluma nabantu abasha.

IBIPHUME ngobuningi intsha yaseVryheid ebebephume ukucotshelelwa ngolwazi lokuqala amabhizinisi. IZITHOMBE: ABAQULUSI MUNICIPALITY

NOMCEBO NGEMA

UMASIPALA waBaQulusi ngokubambisana nabakwa-Government Communication and Information System (GCIS), bacije intsha ngolwazi lokuqala amabhizinisi kowe-Youth Entrepreneurial Seminar, njengoba bebevala inyanga yentsha. Lo mcimbi ubuhlanganise abantu abasha nezikhulu zikahulumeni, zibacathulisa ngokuqala amabhizinisi, amathuba okuqashwa okanye okuthola imisebenzi, ukwesekwa kwamabhizinisi, uxhaso lwawo kanjalo nokuthuthukiswa kwamakhono.

Iminyango kahulumeni ebikhona, uMnyango wezokuQashwa nabaSebenzi, uMnyango wezokuThuthukiswa koMphakathi, uMnyango wezokuThuthukiswa koMnotho, ezokuVakasha nezeMvelo, abakwa-National Development Agency, ikhomishana eyengamele ukhetho kuleli i-IEC nehhovisi likaNdunankulu.IMeya kaMasipala waBaQulusi uCllr Sifiso Mkhwanazi ukhuthaze abantu abasha ngokubaluleka kokuhluza umqondo, ushintsho nokuthola amathuba amasha emisebenzi. IMeya uMkhwanazi ithi abantu abasha akube yibona abadala amathuba emisebenzi kunokuthi kube yibona abafuna imisebenzi.