INTSHA IHLOMULE NGOLWAZI LOBUHOLI KOWE-JCI ETHEKWINI

uMengameli Sphiwe Khuzwayo

UMBIKO: AKHONA DLAMINI

INTSHA ithole ithuba eliyingqayizivele, yokucotshelelwa ngolwazi kumkhakha wezobuchwepheshe nobuholi.
UMengameli weJCI eThekwini, uSphiwe Khuzwayo waseNewlands West, ongomunye wabahleli uthi inhloso yomcimbi ukucobelela intsha ngolwazi kwezobuchwepheshe nokusemgangathweni.
I-JCI yenza lolu chungechunge ngokubambisana ne-Durban University of Technology (DUT), ingeminye yochungechunge oluzokwandulela umcimbi omkhulu ozoqala mhla ziyi-21 kuya mhla ziyi-24 May kulo nyaka e-International Conversation Centre, eThekwini.
“Lolu chungechunge lwemicimbi silwenza ngaphansi kwesiqubulo esithi ‘Empowering Leaders to Drive Positive Change’. Sihlose ukuhlomisa abaholi abasebasha ngamakhono ukuze benze ushintsho olunomthelela waphakade emiphakathini yabo,” kusho uSphiwe.
Uveze ukuthi lolu hlelo luyingxenye yemizamo ebanzi we-JCI eThekwini, wokukhuthaza abaholi abasebasha abangenza izinguquko ezibonakalayo eNingizimu Afrika nakwamanye amazwe.
“Kuningi esingakuzuza ngokuhambisana nombono nenhloso ye-JCI eThekwini, njengoba inhloso kuwukuhlomisa intsha ukuthi ibe ngabaholi abakhuthele. Ukubambisana nesikhungo iDUT kugqamise indima eklanywa yizikhungo zemfundo nezinhlangano zentsha ekubumbeni abaholi abanobuhlakani obuqinile. Ubuholi kufanele buhambisane nesikhathi esiphila kuso futhi imiqondo yethu ihambe phambili, ukuze siqinisekise ngekusasa elinobuholi obuzinzile,” esho.
UMengameli Khuzwayo uhlela konke ngokubambisana noNobhala Jikelele kazwelonke uRofhiwa Tumelo Nengovhela, uMgcinimafa kazwelonke u-Ellen Nyoni, amalungu e-JCI aseThekwini neDUT.