UZOFIHLWA NGESONTO USENZO MFAYELA

UMBIKO: BUSISIWE ZONDI

UZOFIHLWA ngeSonto uMnu Senzo Mfayela obeyilunga nesikhulu se-Inkatha Freedom Party, eMgezengwane Sportfield eNdwedwe ngo-10:00 ekuseni.
Izindaba zokudlula ziqinisekiswe okhulumela i-IFP, uMnu Mkhuleko Hlengwa othe, uMfayela obesegule isikhathi eside.
UMnu Mfayela wajoyina leli qembu ngo-1976 engena ophikweni lwentsha. Uhambe ibanga elide ne -IFP, okugcine esengamele isikhundla sokuba umqondisi wePrince Mangosuthu Buthelezi Foundation.
UMfayela obephinda abe sesigungwini esiphezulu seqembu (National Councilor).

UMfayela uzalelwe eNdwedwe, ezalwa uMnu Dingizwe Mfayela emzala kuMaMdletshe nabo abangasekho emhlabeni. Umngcwabo kulindeleke ukuba uhanjelwe uMhlonishwa Velenkosini Hlabisa ongumholi waleli qembu.