KUWE AMABELE BHU KUBHUNTSHA OWAMABHOKISA
UKUNGAKHOKHWA kwemali yamabhokisa kwiBoxing South Africa (BSA) zingakapheli izinsuku eziyi-14, kuhlehlise umqhudelwano weStarline Boxing Promotions obekumele udlalwe eGreenwood Park Hall eDurban North namhlanje ebusuku.
Leli phephandaba lizibonele bukhoma ngoLwesine ntambama indumalo ebibhalwe ebusweni bamabhokisa, kubhuntsha umdlalo.
Lawa mabhokisa abekhamekile ngenxa yokujima kanzima behambele e-Overport.
Amabhokisa lawa bekumele kwenzeke i-weigh-in, behlolwe udokotela ukuthi akekho yini ogulayo, nokuthi akekho yini oweqile esisindweni asuke ekalelwe sona. Ukungabonwa nangokhalo kwemeneja ye-BSA KwaZulu-Natal uMike Dube nokungafiki kwethimba laseDundee likaNkosingiphile “The Prince” Sibisi, kusolisile.
USibisi ubeqhathwe noZolile Miya wase-Orlando East eSoweto. Umpetha wakuleli kwi-middleweight uJohn “Section 29” Bopape waseGoli, uhlulekile ukufihla ukudumala kwakhe ngokuhlehliswa kwempi njengoba ubezikhame kakhulu elungiselela ukuvikela ibhande kuPhikelelani “The Stinger” Khumalo waseMthwalume.
UNonkululeko Mncube obekuhlelwe adudulane no-Asanda Mkhwanazi embangweni we-KZN junior bantamweight labesifazane, ukhale ngesikhathi sakhe esidlekile.
Uphromotha uZandile Malinga ubonakale exakekile neselulafoni yakhe ingapheli endlebeni, ezwakala ekhuluma nabathile ngenhloso yokuhlenga lo mqhudelwano obulindelwe ngabomvu.
UZandile ukhiphe isitatimende lapho axolise kumabhokisa, umnyango wezemidlalo e-KZN, i-KZN Professional Boxing Federation nakubaxhasi ekubalwa neSABC ebizosakaza lo mqhudelwano. UZandile uthe ubesencamela ngisho ukuthi i-BSA imhlawulise ngokungazigcini izinto ebekumele azenze umqhudelwano uqhubeke ngoba ecabangela amabhokisa. Umemezele ukuthi umqhudelwano usuzothuthela e-Estcourt Town Hall ngomhla ka 15 ngenyanga ezayo.