BAYISHUMI NANYE ABASE-UKZN ABAKHETHELWE UKUDLALELA AMASHARKS U/20
IZIHAMBELA yodwa i-University of KwaZulu-Natal (UKZN) kwabaqokelwe eqenjini lama Sharks U/20 elizodlala emqhudelwaneni iSA Rugby U20 Women’s Tournament.U-Asanda Mnyandu ongomunye wabakhethiwe e-UKZN.
ISITHOMBE: Sithunyelwe
MALIBONGWE MAZIBUKO
ABAFUNDI abayishumi nanye besifazane abavela e-University of KwaZulu-Natal (UKZN) abakhethwe ukuba yingxenye yeqembu le-Sharks U/20 elizobamba iqhaza emqhudelwaneni we-SA Rugby U20 Women’s Tournament ozoba seGoli ngesonto elizayo.
Kulaba badlali kukhona uZandile Ngcobo, Nosipho Mkhize, Hlekane Baloyi, Asanda Mnyandu, Charmaine Mogashoa, Bokamoso Mokali, Tshepiso Maseme, Samkelisiwe Motha, Yamkela Moiloa, Zanele Hlongwane no-Akhona Gumede.
Lo mqhudelwano kazwelonke kuhloswe ngawo ukuvala igebe phakathi kwabadlali abasafunda nabadlala ezingeni eliphezulu, kanye nokuthuthukisa ithalente lesizwe langomuso.
Umqondisi Omkhulu woMnyango Wezokuxhumana e-UKZN, uNksz Normah Zondo, uthe le Nyuvesi iziqhenya kakhulu ngabafundi abakhombise izinga eliphezulu lokudlala nokuzimisela, okuholele ekutheni bakhethwe ukuba bamele isifundazwe.
UZondo uthe impumelelo yalaba badlali ikhombisa ukukhula kwebhola lombhoxo labesifazane kanye nokujula kwethalente e-UKZN, wengeza ngokuthi lokhu kuqinisa isithunzi senyuvesi njengomunye wemikhakha ehamba phambili kwezemidlalo eNingizimu Afrika.
Omunye wabadlali, uBaloyi, uveze ukuthi iqembu lilindele ukudlala ngokubambisana nokwenza kahle emqhudelwaneni ozayo futhi bayazimisela ukujabulela umdlalo, banqobe futhi baqhubeke nokukhula kwezemidlalo.
Kubikwa ukuthi uBaloyi noMnyandu bakelwe eqenjini lesizwe lika-U/20.