UNDUNANKULU UZOGUBHA USUKU LWABESIFAZANE EXOBHO NGESONTO

UHULUMENI waKwaZulu-Natal, umema zonke izakhamuzi zakulesi sifundazwe ukuthi zihlanganyele naye ukugubha usuku lwabantu besifazane ngeSonto. ISITHOMBE: KZNOTP

NOMCEBO NGEMA

UHULUMENI waKwaZulu-Natal oholwa uNdunankulu uMnuz Thamsanqa Ntuli, umema izakhamuzi zakulesi sifundazwe kumcimbi wokubungaza uSuku Lwabesifazane, ngeSonto mhlaka ziyi-9 kuNcwaba, libumbene ihora le-10 ekuseni, enkundleni yezemidlalo iJeffrey Zungu, kuMasipala iJohannes Phumani Phungula, ngaphansi kweSifunda iHarry Gwala.

Kulo nyaka kuzobe kugujwa iminyaka engama-70 abesifazane abanesibindi bamashela ezindlini zombuso (Union Buildings) ngo-1956, beyokhononda ngokuphoqwa ukuthi baphathe amapasi nguhulumeni wengcindezelo. Lo mgubho uzobungazwa ngaphansi kwesiqubulo esithi: “Uma unika owesifazane amandla, uqinisa isizwe.”UNtuli uthi bayazigqaja ngokwenziwe yilaba besifazane, abazidela babhekana ngqo nohulumeni wobandlululo, balwa ngengcindezelo ayayibhekiswe kumuntu omnyama.

UNdunankulu uMnuz uNtuli uzobe ehambisana nabaholi bakahulumeni, abomphakathi abaqhamuka zinkalo zonke zesifundazwe ukuzogubha lolu suku, olwaqoshwa yilaba besifazane, Ababa nesibindi. UNdunankulu uthe ngokubambisana, akuhlonishwe abesifazane abakha isizwe esithuthukayo nesinenqubekela phambili, uphinde utshale ithemba elisha, ukwakha iKwaZulu-Natal encono.