LIHLONISHWE KUZWELONKE IZIKO NGEMISEBENZI YALO EMIHLE
UMnuz Mntomuhle Mcambi ongumphathi nomsunguli wenkampane Iziko Art Company.
STHEMBISO PRO NDLOVU
Iphinde yathola ukuhlonishwa ezingeni likazwe lonke inkampane eshicilela izincwadi iphinde ithuthukise indima yemibhalo Iziko Art Company ngeqhaza layo kule ndima.
Lokhu kwenzeke emcimbini omkhulu obusePitoli ngeledlule obuhlelwe i-Academic and Non-Fiction Authors’ Association of South Africa (ANFASA) ngokohlelo loMnyango Wezemidlalo, Amaciko Namasiko kuzwelonke. Lolu uhlelo loMnyango kazwelonke olukhuthaza ukufunda, ukubhala nokuthuthukiswa kwababhali, nezinkampane zabashicileli bakuleli.
Lo mcimbi obuse-UNISA ePitoli ngoLwesihlanu mhla ka-21 kuLwezi 2025, bekuhloswe ngawo ukukwethulwa kwezincwadi ezintsha ezibhalwe ababhali abahlukahlukene abavela ezweni lonke. Kuqinisekiswe ukuthi bonke ababhali babhale ngezilimi ezisemthethweni zaseNingizimu Afrika kubandakanya ne-breaille.
Nonyaka kwethulwe izincwadi ezingama-21 ezishicilelwe abashicileli abayi-10, kwathi eziyi-7 zaguqulelwa ekutheni zibe ama-audio book, kwahlomula nongoti bolimi abangama-31 okuyibo abebesebenza lezi zincwadi.
Umphathi wenkampane uMnuz Muntomuhle Mcambi uthi kusho lukhulu lokhu kubo kwazise nanyakenye babethole ithuba elifanayo. “Sijabule kakhulu ngoba lokhu kusho ukuthi imisebenzi yethu emihle iyabonakala. Lokhu kuhlonishwa kwethu kuyizithelo zokusebenza kwethu kanzima,” kubeka uMcambi.
Uthi bajabulela ukuthi lolu hlelo lusezingeni lukazwelonke. “Lokhu kusho ukuthi ababhali bethu ebesisebenza nabo sebefinyelele esigabeni sikazwelonke.”
Ababhali okushicilelwe izincwadi zabo ngaphansi kweZiko kubalwa uConstance Marry Nkomi umbhali wenoveli yeSiswati noBhekisisa (BX) Basi obhale incwadi yomlando wesiZulu. Uthi laba babhali bazoqinisekisa ukuthi izincwadi zabo ziyasatshalaliswa izwe lonke nokumaketheka kwazo kube sezingeni elifanele.