UKHAWULA UDLULISE AMAZWI ENDUDUZO EMNDENINI WENKOSI YAMAGCOKAMA
INKOSI Yamagcokama negidangoma layo uSipho Mchunu abadlule engozini yemoto izolo.
UNGQONGQOSHE uMnuz Mntomuhle Khawula edlulisa amazwi enduduzo emndenini wakwaDlamini. IZITHOMBE: FACEBOOK
NOMCEBO NGEMA
UDLULISE amazwi enduduzo emndenini wakwaDlamini, abangani, nezihlobo uNgqongqoshe woMnyango wezeMidlalo, ubuCiko namaSiko KwaZulu-Natal uMnuz Mntomuhle Khawula, kulandela ukudlula emhlabeni kukaS’cebi Dlamini obaziwa kakhulu ngeNkosi Yamagcokama emculweni kamaskandi.
UKhawula udlulise lamazwi ngeSonto ngesikhathi kuqhubeka umcimbi wokugubha usuku lwabantu besifazane obuhlelwe yiHhovisi likaNdunankulu waKwaZulu-Natal, uMnuz Thamsanqa Ntuli, eJeffrey Zungu Sports Ground, ngaphansi kukaMasipala uJohannes Phumani Phungula, eXobho. Uthe indima yomculo igqemeke engeqiwa ntwala ngokudlula emhlabeni kukaS’cebi.
“Sivuke ngezindaba ezibuhlungu namuhla zokudlula emhlabeni kwelinye lamaciko ethu iNkosi Yamagcokama, ebe sengozini yemoto edlule nomphefumulo wakhe. Ngidlulisa amazwi enduduzo emndenini wonke wakwaDlamini, abangani, izihlobo, amaciko ebesebenza nawo endimeni, nakubalandeli bakhe ngithi abaduduzeke, alwehlanga lungehlanga. Indima yethu yamaciko igqemeke engeqiwa ntwala ikakhulukazi eyomculo kamaskandi. Bese befana nomndeni owodwa. Nathi siwuMnyango wezobuCiko kugadle kwezwela ukudlula kwakhe,” kusho uNgqongqoshe uKhawula.
Uthe ngesikhathi beqala ukushumayela ivangeli lokuthi amaciko awazifundise ukudlala esteji bukhoma ema-theatre, iNkosi Yamagcokama ingenye yabaphakamisa kuqala. ” UScebi wathi ingasishaya isiginci e-The Playhouse nozakwabo. Nangempela waba owokuqala ukugcwalisa i-The Playhouse futhi wenza lolu hlelo lwethu lwaphila ngoba uyena owangena kuqala wavula umnyango,” kusho uNgqongqoshe uMnuz uKhawula.
INkosi Yamagcokama idlule emhlabeni negidangoma layo uSipho “Gupta” Mchunu ngoMgqibelo, ebusuku engozini yemoto beyonandisa eRichards Bay emcimbini wokuhlonipha abantu besifazane. INkosi Yamagcokama izokhumbuleka ngezingoma zothando kanye nokuqhakambisa indawo yangakubo eMsinga, eMachunwini.