KWEHLE ULAKA KWABE-SUNDOWNS

UMIGUEL Cardoso wehlise ulaka lwabalandeli beSundowns ngokuguqisa iSekhukhune United koweBetway Priemership
ISITHOMBE: High Performance Football

MALIBONGWE MAZIBUKO

UMBANGO wesicoco seBetway Premiership uya ngokuya uba nzima njengoba i-Orlando Pirates seyizithola isengozini yokushiywa yiMamelodi Sundowns esivule igebe lamaphuzu amathathu kwi-log yeBetway Premiership emuva kwemidlalo eyi-15. Lokhu kulandela ukunqoba kweSundowns iSekhukhune United ngo 2-0 emdlalweni obunzima. Amagoli angene ngasekupheleni kwesiwombe sesibili sekusele imizuzu emine kuphele umdlalo. Ashaywe nguNuno Santos noBryan Leon. Ukunqoba kweSundowns kungenzeka kwehlise ulaka kubalandeli abangasayizwa eyomqeqeshi, uMiguel Cardoso , onamazinyo abusheshelezi ngenxa yokudlala imidlalo ngendlela engagculisi.

Ngaphezu kwalokho, kufaka ingcindezi enkulu ku-Orlando Pirates, okuzomele ibhukule iqoqe amaphuzu emidlalweni emibili esele ngayo kwiSundowns ukuze ivale igebe. Njengamanje iSundowns ihlezi esicongweni se-log ngamaphuzu angama-32, iPirates ilandela ngamaphuzu angama-29. Uma iBucs ingakwazi ukunqoba yomibili imidlalo esele ngayo, ingazibeka ethubeni elihle lokuhlala phezulu ngamaphuzu angama-35.