UQOKWE NJENGESO LESILO UZONDI
UNGQONGQOSHE uMfundisi Thulasizwe Buthelezi enika ngokusemthethweni uMnuz Malusi Zondi isitifiketi sokuqokwa kwakhe. ISITHOMBE: KZNCOGTA
NOMCEBO NGEMA
SIDLULISELWE ngokusemthethweni uNgqongqoshe woMnyango weZokubusa ngokuBambisana neZindaba zoMdabu uMfundisi Thulasizwe Buthelezi, isitifiketi esiqinisekisa ukuqokwa kukaMnuz Malusi Zondi njengeSo leSilo uMisuzulu KaZwelithini esigodlweni eMbelebeleni nasemahostela, eThekwini namuhla.
UMnuz uZondi ubekade enguShansela weNdlunkulu kaZulu, njengoba manje eseqokwe njengeSo leSilo ukuze abheke zonke izindawo ezakhelwe amakhosi, ngenhloso yokuqinisekisa ukuthi ayihlupheki indlu emnyama kaZulu.
UMnuz uZondi uthembise ukuzibophezela ekuthuthukiseni amaKhosi, izinduna zeSilo nabantu abamnyama jikelele.
Uthi uzogxila ekuletheni intuthuko ezindaweni zamakhosi.