KUBOSHWE E-MOZAMBIQUE ABASOLWA NGOKUBULALA IZITHANDANI EKRUGER

U-ERNEST Marais nesinqandamathe sakhe uDina Marais ababulawa ngesihluku eKruger National Park ngenyanga edlule. ISITHOMBE: FACEBOOK

NOMCEBO NGEMA

BALALE bebaliwe abesilisa ababili baseMozambique abasolwa ngokubulala ngesihluku u-Ernest Marais oneminyaka engama-71 ubudala, nonkosikazi wakhe uDina Marais oneminyaka engama-73 ubudala, ngaphakathi eKruger National Park. Lezithandani ezazivakashile kule ndawo zatholakala zibulewe mhla zingama-21 kuNhlaba kulonyaka, engxenyeni yepaki zinamanxeba amaningi okugwazwa.

Imoto yabo yohlobo lwe-Ford Ranger yantshontshwa ngemuva kwesigameko, yabe isilandelwa yaze yatholakala eMozambique.

Abasolwa baneminyaka engama-32 ubudala, omunye unengama-33 ubudala, baboshwe mhla lu-1 kwathi omunye waboshwa mhla zi-2 kulenyanga edolobheni laseChókwè, omunye waboshwa kwelaseXai-Xai ngemumva kokusebenza ngokubambisana kweziphathimandla zaseNingizimu Afrika nezaseMozambique.

UNgqongqoshe wezaMahlathi, ukuDoba nezeMvelo kuzwelonke, uMnuz Willie Aucamp, uthi labasolwa kuthiwa sebevumile ukuthi bayathinteka kulolu daba lokubulawa kwezithandani. Uthi seluqaliwe uhlelo lokubabuyisa eNingizimu Afrika ukuze babhekane namacala okubulala, ukuduna imoto kanye namanye angase engezwe njengoba uphenyo luqhubeka.