BAZOHLUKANA PHAKATHI ABALANDELI BEBHOLA

UMBIKO: MABUNHLE MLABA

BAZOHLUKANA phakathi abalandeli bebhola KwaZulu-Natal ngempelasonto yomhla ziyi-26 kuJulayi 26 njengoba kunemiqhudelwano emibili emikhulu.
I-KZN Premier’s Cup, evamise ukudlalwa amaqembu ePSL akulesi sifundazwe ngaphambi kokuqala kwesizini entsha, ibekelwe impelasonto eqondene neToyota Cup ezodlalwa yiKaizer Chiefs ne-Asante Kotoko yaseGhana.
IPremier’s Cup ibuyela eRichards Bay ngemuva kweminyaka idlalelwa oLundi.
IToyota Cup yona izogijinyelwa eMoses Mabhida, eThekwini.
Kulo mdlalo kulindeleke iChiefs ikhombise abalandeli bayo izinduku zayp ezintsha ukuthi sekusele isikhathi esincane kuqale isizini.
IPremier’s Cup kulindeleke idlalelwe ngamaqembu akuBetway Premiership AmaZulu FC, Golden Arrows, Richards Bay FC neDurban City, neqembu elidlala kwiMotsepe Foundation Championship, iMilford FC, okusengenzeka lijoyinwe yiMidlands Wanderers yaseMgungundlovu uma iphumelela kumaPlay-Offs kazwelonke eSafa ABC Motsepe League aqala eGauteng ngoJuly 1-6.