KUSOLWA UKUNGAHOSHELANI KUKA-MINNIE NO-FELIX OKWENZE IZINGUQUKO
UMINNIE Ntuli usezoshayela uhlelo iGagasi Fast Lane, noSphectacular noDJ Naves.
USELBY Mkhize osezoshayela uhlelo iGagasi FM Breakfast noFelix Hlophe. IZITHOMBE:IGAGASI FM
AKHONA DLAMINI
KUSOLWA ukungahoshelani kwabasakazi, okuholele ekutheni isiteshi somsakazo esizinze eThekwini iGagasi FM, simemezele izinguquko ezintsha ezinhlelweni. Ngokuthola kwaleli phephandaba kuke kwaputshuka umbhalo wesifazane, ekhala ngokuhlukunyezwa uzakwabo wesilisa, lo msakazi wesifazane wabhala ekhasini lakhe ku-Facebook, okuthe kungakapheli imizuzu emingaki wasusa.
Kuthiwa lo msakazi wesilisa kujwayelekile ukuthi angazwani no msakazi asuke esingathe naye okuvele ukuthi akaxosheki ngenxa yokuba sentendeni yabalaleli ngenxa yokukhuphula izinombolo zalo msakazo. IGagasi FM lithe ligudlule uMinnie Ntuli ukushayela uhlelo lwasekuseni ngenxa yokuthi usanda kubeletha, nokuthi bayaqhubeka nokuletha izinhlelo eziseqophelweni eliphezulu kubalaleli.
USelby “Selbeyonce” Mkhize ujoyine uFelix Hlophe ohlelweni lwasekuseni iGagasi FM Breakfast, olusakazwa phakathi kwehora lesithupha kuya kwelesishiyagalolunye ngoMsombuluko kuya kuLwesihlanu. UMinnie Ntuli uthuthele ohlelweni lwantambama iGagasi Fast Lane, lapho ezosebenzisana khona noSphectacular kanye noDJ Naves phakathi kwehora lesithathu kuya kwelesithupha ntambama.
Ngakolunye uhlangothi, kuzofakwa ozoba umdidiyeli wokuqukethwe ezinkundleni zokuxhumana, u-Ashay Sewlal owaduma kakhulu kowe-Big Brother, uzoba yingxenye yohlelo Umsindo Takeover njalo ngoMgqibelo phakathi kwehora lesine kuya kwelesikhombisa ntambama.
INhloko ye-Ad Audience Experience kulesi siteshi, u-Alex Mthiyane uthe zonke lezi zinguquko bazenze ngenhloso yokujabulisa abalaleli nokujwayeza abasakazi izinhlelo ezahlukene. “Kuzo zonke izinguquko sihlezi sibeka phambili abalaleli bethu. Asingabazi nakancane ukuthi uSelbeyonce uzongena athi khaxa ezicathulweni zikaMinnie ohlelweni lwasekuseni, nakanjalo noMinnie uzosivala isikhala sika-Selby ohlelweni lwantambama. Ukufakwa kuka-Ashay Sewlal kuzokwenza uhlelo Umsindo Takeover lube sematheni kakhulu njengoba u-Ashay ethandwa izinkumbi zabantu,” kusho uMthiyane.