IDFF IBUYISE ABASUNGULI BEMFASHINI ABADALA

INGQEPHU ezobe ikhonjiswa kowe-DFF. ISITHOMBE: SITHUNYELWE

AKHONA DLAMINI

I-DURBAN Fashion Fair (DFF) izogubha iminyaka eyi-15 yasungulwa, ngokubuyisa abasunguli bemfashini abake babamba iqhaza kulolu hlelo eminyakeni eyedlule.

Laba bazophinde bavele kwindumezulu yomcimbi ezothatha izinsuku ezimbili eDurban Exhibition Centre, kusukela mhla ziyi-16 kuya ku-18 kuMandulo 2026.

Lo mcimbi, ozoba ngaphansi kwesiqubulo esithi: “Where Legacy Lives”, uzohlanganisa abasunguli asebemnkantshubomvu embonini, abasafufusa neDFF Mentee Class ka-2026.

Phakathi kwezinkakha nezingqalabutho ezizokuba khona kubalwa uKwenzi Nkomo we-Indoni Fashion House, uMxolisi Mkhize weHouse of Saint Luke noZama Gumede weZaviar Fashion House, bonke asebengosomabhizinisi abavelele kulo mkhakha.

UNkomo, owaqala ukuvela kwi-DFF ngo-2014, uthe lolu hlelo luklame indima enkulu ohambweni lwakhe.
“Sizobe sigubha uhambo lwethu endimeni sikhangisa ngomsebenzi wethu, sizophinde sikhuthaze izizukulwane ezilandelayo zabasunguli bengqephu,” usho kanje.

Abasunguli bemfashini ababalelwa kwabangama-84 bazokhombisa umsebenzi wabo kulezi zinsuku ezintathu, kanti umbukiso uzokwandulela iDurban Fashion Fair Recognition Awards, azoba mhla ziyi-19 kuMandulo.
Amathikithi alo mcimbi aseyatholakala eWebtickets, ePick n Pay naseBoxer ngenani eliqala ku-R120.