IMARCH AND MARCH IZOKUBA NEMASHI YOKULWA NE-GBV
UBUHOLI beMarch and March ngesikhathi bukhuluma nabezindaba ngeSonto eMhlanga.
IZITHOMBE: UMUSA NEWS
OWAMI THABETHE
INHLANGANO iMarch and March, isimemezele imashi kazwelonke ezoba mhla zingama-30 kuMandulo 2026, eNingizimu Afrika jikelele ezolwisana nesihlava sokuhlukunyezwa nokubulawa kwabesifazane (GBV). Lokhu bakumemezele ngesikhathi abaholi bale nhlangano bebambe isithangami nabemithombo yezindaba eGarden Hotel eMhlanga ngeSonto mhla zingama-20 kuMandulo.
USomlomo kazwelonke wale nhlangano uSandile Dube, uthe kuyimizamo yale nhlangano ukusukumela phezulu odabeni lokubulawa kwabesifazane okudlangile ezweni.
“Sibiza wonke amadoda aseNingizimu Afrika jikelele ukuba azobamba iqhaza silwe ne-GBV, sifisa sengathi nabasebenzayo bengacela amakhefu emisebenzini yabo bezomasha nathi,” kuchaza uDube.
Unxuse wonke amadoda akuleli ezinhlanga ezehlukene ukuthi abe yingxenye yale mashi.
” Le mashi angeke ifane namanye njengoba sizobe sigubha unyaka le nhlangano yasungulwa, “esho.
Uveze ukuthi le mashi izoba ngenkulu, ukudlula eyangoNhlangulana eyayihlanganise izinkulungwane zabantu abaphuma emagumbini amane eTheku.
Imashi izokwenzeka kuzo zonke izifundazwe kanti eThekwini izoqala enkabeni yedolobha iTheku, idlulele eMnyangweni wezaseKhaya iyophetha e-SADC Summit Venue.
