KUSHIYA ISILOMO KUMDLALO WE-GENERATIONS

UMBIKO: MABUNHLE MLABA

IGENERATIONS: The Legacy ekusanda kuvela ukuthi izulelwa amanqe kwa-SABC, ngenxa yokungenzi kahle ezibalweni zokubukwa, isishiywe esinye sezilomo zabalingisi bayo.
USix Nyamane odlala indawo kaNozipho oyintatheli evutha ukhanda, umememezele ekhasini lakhe lokuxhumana ezinkundleni ukuthi ugcine ukuqopha kulo mdlalo ngoFebruary. “Njengamanje sengibuyele ekhaya KwaZulu-Natal, njengoba ngimatasa ngilungiselela isidudla somshado wami.” Uthe bekungelula ukuthatha isinqumo sokuhlukana nalo mdlalo, obalwa nemidlala kwa-SABC kodwa ekugcineni uthe ufuna ukukhula kulo mkhakha kaqedisizungu.
“Kuningi engikufundile kanti sengikulungele ukukhombisa umhlaba ukuthi ikuphi okunye engiphiwe ngekhono lami,” usho kanje.
Ngaphandle kokulingisa le ntokazi ibuye ibe u-DJ wasemaklabhini kanti ibuye yenze izikhangiso.