KUPHENYWA ONESI ABATHATHELE ISIGULI OMASINGCWABISANE
AMAPHOYISA aKwaZulu-Natal aphenya abahlengikazi basesibhedlela i-Applebosch
NOMCEBO NGEMA
KUPHENYWA ababengabahlengikazi abathathu KwaZulu-Natal ngezinsolo zokuthathela umshwalense umlisa ongasekho emhlabeni uMnuz Nduduzo Mbatha ngaphandle kwemvume yomndeni wakhe.
Ngokuthola kwaleli phephandaba kuthiwa abahlengikazi bathathela umshwalense uMnuz Mbatha obeyisiguli esibhedlela i-Applebosch Ozwathini, eNdwedwe, umndeni wakhe ungazi.
Kuthe uma kuba nezinsolo abahlengikazi basula ukusebenza kulesi esibhedlela, ngemva kokuthi uMnyango wezeMpilo KwaZulu-Natal oholwa uNgqongqoshe uNkk Nomagugu Simelane-Mngadi ukhulume nabo.
Abaphathi besibhedlela babike ukuthi abahlengikazi baziphikile lezi zinsolo futhi benqaba ukuthumela izitatimende ezibhaliwe, bagcina ngokusula isigubhukane, emsebenzini kungakapheli amahora angama-24.
Lolu daba seludluliselwe Ophikweni Olukhethekile Oluphenya Ngamacala ukuze kwenziwe uphenyo lwangaphakathi olugcwele kanti amaphoyisa aKwaZulu-Natal ayaphenya futhi nomnyango uyasebenzisana neziphathimandla ukuthola ukuthi kwenzekeni.