UGAQELWE ELASE-MELIKA OWE-PIRATES

KUKHONJWA elaseMelika eligaqele isitobha se-Orlando Pirates. ISITHOMBE: Goal.com

MALIBONGWE MAZIBUKO

EZIHAMBA ngaphansi kwamatafula, zivela nokuthi iqembu le-Orlando Pirates selivumele isicelo seqembu laseMelika eligijima kwiMajor League Soccer iChicago Fire, sokuthenga umdlali oyisitobha seqembu uMbekezeli Mbokazi ngenani lemali elilinganiselwa kuR51 million.
Lo mdlali oneminyaka engama-20 kukholakala ukuthi usebhekise amabombo kwelaseMelika ukuyoqedela izingxongxo, njengoba ebonakale esikhumulweni sezindiza i-OR Tambo International nabammeli bakhe.
Kulindeleke ukuthi uMbokazi ajoyine iChicago Fire ngokuphelele ngemva kwemidlalo ye-Africa Cup of Nations, ezoqala ngenyanga ezayo uma sekuvulwe iwindi lokuhweba ngabadlali ngoMasingana.
Uyojoyina abadlali baseNingizimu Afrika abagijima eMelika okubalwa kubo uOlwethu Makhanya kanye noBongokuhle Hlongwane.