UZOQALA MADUZANE UMQHUDELWANO WE-NETBALL EMANGUZI
UBUHANJELWE abahloniswa umcimbi wokwethulwa kweNdebe yeNetball eManguzi.
ISITHOMBE : KZN Netball
MALIBONGWE MAZIBUKO
KWETHULWE ngokusemthethweni amaqembu azoqathwa kwindebe yesibili yeKZN Netball Premier’s Cup, ngobuchwepheshe bokuxhumana nge-inthanethi.
Kulo mcimbi uNdunankulu
waKwaZulu-Natal uMnu Thamsanqa Ntuli, uNgqongqoshe wezeMidlalo, EzobuCiko namaSiko uMnu Mntomuhle Khawula, uMengameli weKZN Netball uNksz Gugu Ngema noMengameli weKZN Sports Confederation uMnu Thami Mchunu, bebehambele lo mcimbi wokuthulwa ngokusemthethweni iNdebe yebhola lomnqakiswano.
Lo mqhudelwano kulindeleke ukuthi ubanjelwe eManguzi, esifundeni sase-uMkhanyakude District Municipality, kusukela mhla ziyi-19 kuya zingama-22 kuNhlolanja.
UNtuli uzwakalise uthi lo mcimbi uzoba yimpumelelo, wagcizelela ukubaluleka kokubambisana kwazo zonke izinhlaka ezithintekayo, okubalwa nabezindaba.
UNgqongqoshe wezeMidlalo, ezobuCiko namaSiko uMnuz Mntomuhle Khawula, uthe ubhekwe ngabomvu lomqhudelwano, onesasasa elingaka, wanxusa abalandeli ukuthi baphume ngobuningi babo bezokweseka abadlali.
Umeme abaculi nezinye izinhlaka zemidlalo ukuthi bazohlanganyela ekwesekeni lo mcimbi.
UMengameli weKZN Netball uNksz Gugu Ngema uzibophezele ekusebenzeni ngokuzikhandla ukuqinisekisa ukuthi lo mqhudelwano uba yimpumelelo, ngenhloso yokukhuphula izinga nokuhlonishwa kweKZN Netball Premier’s Cup.