INTSHA ITHOLE UQEQESHO OLUYINGQAYIZIVELE

INTSHA eyi-100 ebe senhlanhleni yaqokwa ukuthola uqeqesho lwamakhono. ISITHOMBE: ETHEKWINI MUNICIPALITY

NOMCEBO NGEMA

INJABULO ibibhalwe emehlweni kubantu abasha abayi-100 baseNtuzuma, abangasebenzi ngesikhathi beqala uqeqesho lwamakhono, eNtuzuma Teacher’s Centre.

Leli thuba eliyingqayizivele lizovulela lentsha amathuba emisebenzi, iyingxenye yokwakhiwa kwenxanxathela yezitolo esiqalile ukwakhiwa eNtuzuma, iNozaza Node Hub, ukwakhiwa kwezindlu, nezinye izinhlelo zentuthuko eseziqalile kule ndawo.

Lolu qeqesho lulethwe uMnyango kaMasipala weTheku, i-eThekwini Municipal Academy, luzothatha izinyanga ezintathu futhi luzocija intsha ngamakhono okubalwa kuwo awokusebenza ngogesi, ukubeka isitini, ukufaka amapayipi nama-tiles.