IZOQHOQHOBALWA YIZINJINGA ZASE-KZN I-NATIONAL LOTTO

ISITHOMBE:IOL

UMBIKO: ZETHU PHOSWA

ZINYELWE inyoni ezandleni Izinjinga ezimbili zaKwaZulu-Natal, kulandela ukuqokwa kwenkampani yazo iSizekhaya Holdings, ukuqhoqhobala i-National Lottery iminyaka eyi-8.
Ukuqokwa kwale nkampani yale zicebi okunguMnuz Moses Tembe noMnuz Sandile Zungu, kushayise amakhala kwamanye amaqembu zepolitiki okubalwa I-EFF, ngokusola isandla semfene, ukuqokwa kwenkampani engumafikizolo okuyinto engalandelwanga imigomo yokuqokwa kwenkampani.
Ukumenyezelwa kwenkampani ezosingatha lesi sikhondlakhondla bekulindelwe ngabomvu, njengoba inkontileka yenkampani i-Ithuba ebiqhoqhobele Lo msebenzi kusukela ngonyaka wezi-2015 iphele kule nyanga kaNhlaba.
Ethula isimemezelo uNgqongqoshe woMnyango wezokuHweba neziMboni nezokuNcintisana kuleli uMnuz Parks Tau uveze ukuthi basabheka iseluleko sezomthetho ukuze kudluliswe lesi sinqumo nagcizelele ubunzima okukhona kulolu hlelo.
“Lokhu kunqoba kuncishiswa yizinselelo ezingaphansi kwezomthetho, njengoba inqubo yokukhipha amalayisensi isidonse kakhulu ngenkathi kucutshungulwa okuholela ekwahlulelweni kweNkantolo Ephakeme,” kuchaza uTau.
Uveze ukuthi uyabophezela ekuhlonipheni wonke amalungelo amayelana nokutholwe yinkantolo, ngesikhathi egcizelela isethembiso sakhe kubafaki zicelo abathintekayo.
ISizekhaya Holdings izobe isebenzisaza neGlenlot njengomsizi kwezobuchwepgeshe (technical partner) . UMnuz Moses Tembe weSizekhaya Holdings uthe zibuyile emasisweni futhi lizogaya ngomunye umhlathi kwiNational Lottery njengoba ubudlelwano babo noGlenlot buzoletha lukhulu.
“INingizimu Afrika iwelwe inhlanhla nge Sizekhaya. Ulwazi lwethu kwezokugembula nokudlala kuzosiza kwilottery ebhekele nokwenza imisebenzi eminingi yesihe ezozusisa abaningi,” kuveza uTembe.