ISASASA KUMJAHO WE-WORLD ATHLETICS CONTINENTAL TOUR CHALLENGER.

KUQOPHEKE imilando emisha kumqhudelwano we-World Athletics Continental Tour Challenger.
ISITHOMBE: WACTC

MALIBONGWE MAZIBUKO

UMJAHO wezokugijima owaziwa kakhulu, i-World Athletics Continental Tour Challenger, obuhlelwe yisihlabani sezemidlalo, uHezekiel Siepeng, uqhubeke nokugqama ngokukhiqiza imiphumela ephula amarekhodi.

Abahleli bathi lo mqhudelwano uyaqhubeka nokuba yisikhuthazi esikhulu kwezemidlalo ikakhulukazi kwezokusubatha njengoba uheha abagijimi abavela kuzo zonke izifundazwe abazofika bazozizwela ubuhle bedolobha laseThekwini.
Ngaphandle kwemincintiswano yezinga eliphezulu, lo mjaho usalokhu uyisigaba esibalulekile kubagijimi abaningi njengoba uyindlela yokuzibekisela indawo kwiComrades Marathon. Umklomelo wokuqala ufinyelela ku-R80,000, kanti nemali ephelele yemiklomelo ihlonipha abagijimi abahlanu abaphambili esigabeni esivulekile.
Ohlwini lwabagijimi bamazwe ngamazwe abavelele kwabesilisa kukhona uMelesa Solomon Kibret wase-Ethiopia ohambe phambili ngesikhathi esingu-02:10:26, kulandelwa uNgonidzashe Ncube waseZimbabwe noWilfred Kiplangat wase-Uganda. Kwabesifazane bamazwe ngamazwe, uAlemitu Ajema Lema wase-Ethiopia ushaye intambo phambili ngesikhathi esingu-02:31:36, elandelwa nguZewudinesh Hurisa Degefa.
Esigabeni ze-ASA National Championship, uReghen Magwai uhambe phambili kwabesilisa, kanti u-Annie Bothma uhambe phambili kwabesifazane. Bobabili babalwe kwamanye amagama ahlonishwayo akulo mqhudelwano.
Kulo mcimbi kubonakale nezikhulu ezihloniphekile okubalwa kuzo uSihle Shange ongumqondisi womjaho, uManqoba Bhengu omele uMnyango wezeMidlalo, ubuCiko namaSiko KwaZulu-Natal, iPhini leMeya yaseThekwini uZandile Myeni, uMongameli weKZNA uSteve Mkasi kanye nomsunguli weHolifit uNkosi Zungu.
Lo mcimbi uyaqhubeka nokukhulisa izinga lezokugijima eNingizimu Afrika futhi unikeza abagijimi amathuba okuzibonakalisa kanye nokuthuthukisa amathalente ezemidlalo ezweni.