ABAQULUSI NOMKHANKASO WOKUVALA IMIGODI EMIGWAQENI

UMASIPALA waseBaqulusini uvala imigodi emigwaqeni yaseVryheid ebiyenza ukuthi abashayela bathwale kanzima uma beshayela. ISITHOMBE: ABAQULUSI MUNICIPALITY

NOMCEBO NGEMA

UYAQHUBEKA nokubeka eqhulwini inhlalakahle nokuphepha komphakathi uMasipala waseBaqulusini, oholwa iMeya uCllr Sifiso Mkhwanazi, njengoba izolo uphume umkhankaso wokuvala imigodi emigwaqeni (potholes) edolobheni eVryheid.

UMasipala uvale imigodi emgwaqeni uMark Street (phakathi kuka-Mason no-East Streets), uHeeren Street (phakathi kuka-Van Riebeeck no-East Streets) nasezimpambanweni zomgwaqo uVan Riebeeck no-Heeren Street.

“UMasipala uyakuqonda ukukhathazeka okudalwe isimo esingesihle semigwaqo yakuleli dolobha nezindawo ezakhele lona. Lolu hlelo esiluqalile lokulungisa imigwaqo luhlose ukuthi kube nokuphepha emgwaqeni nokuhamba kahle kwezimoto. Lo mkhankaso wokulungiswa kwemigwaqo awuzogcina lapha edolobheni kuphela, kodwa uzoqhubeka wenziwe nakwezinye izindawo ezikhahlamezekile, ukuze kube nokuphepha emigwaqeni esetshenziswa izakhamuzi,” ngokusho kukaMasipala waseBaqulusini.