OWOSUTHU UQOKWE OHLWINI LWABALANDELI ABAYOSEKA IBAFANA
UNDUMISO “Dlamini” Zondi ungomunywe wabalandeli abaqokelwe ukuyokweseka iBafana Bafana eMexico koweNdebe yomhlaba.
ISITHOMBE:Sithunyelwe
MALIBONGWE MAZIBUKO
UMNYANGO wezeMidlalo, ubuCiko namaSiko, ngaphansi kobuholi bukaNgqongqoshe uGayton McKenzie, usumemezele ngokusemthethweni amagama abalandeli abakhethiwe, ohlelweni olubizwa ngeMzansi to the World Cup Lucky Fan Competition.
Lolu hlelo luzothumela abalandeli abangu-16 abavela emaqenjini eBetway Premiership baseNingizimu Afrika ohambweni olukhokhelwe ngokuphelele oluya eMexico, lapho bezobuka khona iBafana ibhekene neMexico emdlalweni wokuvula weqoqo leNdebe yoMhlaba ka-2026, ozodlalelwa eMexico City mhla ziyi-11 kuNhlangulana.
Umnyango uthi lolu hlelo lwenziwe ngokubambisana nabaxhasi ababili abakhulu, ngenhloso yokuvusa abalandeli abathembekile nokukhuthaza uthando lwebhola kuleli.
Abalandeli abangu-16 abavela emaqenjini eBetway Premiership asebekhethiwe kubalwa uBonakale Hlengiwe Nzuza (Orlando Pirates), uSebe Thusi (TS Galaxy), uAdam Mtombeni (Kaizer Chiefs), uKonelo John Tahlo (Siwelele FC), uNdumiso Zondi (AmaZulu FC), uErnest Jacobs (Stellenbosch FC), uHlekulani Kobe (Magesi FC), uHappiness Dumakude (Lamontville Golden Arrows), uVennitious Motswi (Kaizer Chiefs), uObakeng Mokgara (Mamelodi Sundowns), uMamello Constance Makha (Mamelodi Sundowns), uMickey Seroke Mokone (Orbit College FC), u-Adam Schlosberg (Chippa United), uThaven Pillay (Durban City FC), uSalmaan Khan (Richards Bay FC kanye noTshegofatso Sello (Marumo Gallants FC).
UMnyango uphinde wacacisa ukuthi kuzokhethwa abanye abalandeli abane ukuze kugcwaliseke isibalo sabangu-20, njengoba lolu hlelo lubhekiswe kubalandeli abavela ezindaweni ezahlukene ezweni.
Umklomelo uhlanganisa amathikithi endiza okufinyelela eMexico, ukuhlala izinsuku ezintathu ehhotela eliseduze nenkundla, ukudla, ithikithi lomdlalo phakathi kweMexico neBafana Bafana, kanye nokuhanjiswa nokwesekwa kohambo kuso sonke isikhathi.
UMnyango uthi lolu hlelo luyingxenye yemizamo kahulumeni yokukhuthaza nokuvuselela uthando lwebhola, kanye nokubonga indima edlalwa abalandeli ekukhuliseni lo mdlalo eNingizimu Afrika.
