UNQOBE ISICOCO SE-ITALIAN OPEN OWASE-ITALY

KUQOPHEKE umlando omusha kwi-Italian Open inqotshwa uJannik Sinner wase-Italy.
ISITHOMBE: ATP Tour

MALIBONGWE MAZIBUKO

UJANNIK Sinner uqophe umlando kwithenisi yase-Italy, kulandela ukunqoba uCasper Ruud ngo 6-4, 6-4 kowamanqamu e-Italian Open ngeSonto, waba ngumdlali wokuqala wase-Italy wesilisa onqobe le ndebe eminyakeni engu-50.
Lo mdlali ohamba phambili emhlabeni jikelele, uqede ukulinda okude selokhu u-Adriano Panatta, agcina ukunqoba lo mqhudelwano ngo-1976, wanikeza abalandeli basekhaya injabulo enkulu enkundleni e-Foro Italico.
Lokhu kunqoba kuphinde kwenza uSinner waba ngumdlali wesibili emlandweni emuva kuka-Novak Djokovic ukunqoba yonke imiqhudelwano eyisishiyagalolunye yeMasters 1000, okuyimpumelelo eyaziwa nge-“Golden Masters”. Lo mdlali oneminyaka eyi-24 uqhubekile nokukhombisa ukubusa emhlabeni wethenisi, njengoba eselule uchungechunge lokunqoba lwaba yimidlalo eyi-29 ilandelana. USinner usewine futhi imiqhudelwano yeMasters 1000 eMonte-Carlo naseMadrid, kanti manje ungena kwi-French Open engakanqotshwa ezinkundleni zobumba kulo nyaka.
USinner ugubhe ngokuthula okujwayelekile kuye, injabulo igcwele ebusweni ngemuva kokushaya iphuzu lokugcina eliqinisekise indebe, ngaphambi kokubingelela izinkumbi zabalandeli, lapho uPanatta ebehlezi khona emgqeni ongaphambili ezobona umlando uqoshwa.