KUQINE AMANKWAHLA KUZUMA WAPHOQA UDUDUZILE AXOLISE

UMBIKO: ZETHU PHOSWA

KUQINE amankwahla kulowo onguMengameli woMkhonto Wesizwe Party (MKP) uMnuz Jacob Zuma, wayalela indodakazi yakhe uDuduzile ukuthi ixolise ngenkulumo ebilumela eyibhekise kulowo onguNobhala jikelele waleli qembu uMnuz Floyd Shivambu.
Lokhu kwenzeke ngemuva kokuthi lowo oyindodakazi kaJacob Zuma engaconsi phansi kuyise, uNkk Zuma-Sambudla ebhale ekhasini lakhe laku-X, ukuthi usola uShivambu ngokuba isilingo eqenjini iMK Party.
Lokhu kubhala kukaDuduzile kucasule abalandeli baleli qembu, njengoba kuthiwa bakuthathe njengento
ecasulayo, engahambisani nengqubomgomo yokuziphatha kweqembu nezokwenza uqhekeko eqenjini

Le ngxabano isiholele ekutheni uMengameli waleli qembu uMnuz uZuma akhiphe isitatemendi esiyalela uZuma-Sambundla ukuba axolise ngokushesha kuNobhala weMK Party.
Esitatimendeni uZuma uveze ukuthi iMK Party isiyazi ngelunga layo elikhwele ladilika kuNobhala weqembu uShivambu.
“Isenzo sakhe siphambene nomthetho sisekelo weqembu uMkhonto Wesizwe, sikhombisa ukungahloniphi singase sidala uqhekeko eqenjini.
UNkk Duduzile Zuma-Sambudla kumele axolise ngokuphuthuma kuNobhala uShivambu, uMengameli weqembu, kumalunga eqembu nakuwo wonke umuntu ezweni ngesenzo sakhe. Uma ehluleka ukwenza lokho ngokushesha uzothathelwa izinyathelo ezinqala,”kuchaza uZuma esitatimendeni esikhishwe iMK Party.