ITHEKU LIYAQHUBEKA NOKUTHUTHUKA KWEZOKUVAKASHA

IMEYA yakuMasipala weTheku uCllr Cyril Xaba ethula inkulumo kwisithangami sabezindaba.

ABEZINDABA bathole ithuba lokuvakashela iGoodenough Dam, eMkhomazi. IZITHOMBE : ETHEKWINI MUNICIPALITY

AKHONA DLAMINI

IMEYA kaMasipala weTheku uCllr Cyril Xaba ithi idolobha liyaqhubeka nokwenza kahle emikhakheni yezokuvakasha nokulethwa kwezidingo zomphakathi. Lokhu ukusho ngesikhathi ekhuluma kwisithangami sabezindaba eMoses Mabhida Stadium, eThekwini izolo.

Lesi sithangami besihlelwe nguMasipala weTheku ngaphansi kwePresidential eThekwini Working Group (PeWG), ngenhloso yokwethula inqubekela phambili yezinhlelo ezahlukene zokuthuthukisa idolobha. Phakathi kwezihloko ebezidingidwa kubalwa amalungiselelo eNgqungquthela yeSADC ezosingathwa yiTheku, nezinhlelo zokwakha isithombe esihle sedolobha ngokubambisana neBrand South Africa kanye neGoodenough Dam ezophothulwa maduze.

“Umkhakha wezokuvakasha uyaqhubeka nokuba namagalelo amakhulu emnothweni wedolobha. Ngonyaka odlule izindawo zokulala zangenisa imali elinganiselwa kwizigidi ezingu-R1.2m okungamaphesenti ayi-77 , lokho kuyinkomba yokuthi iTheku lisalokhu liyindawo eheha izivakashi ezivela ngaphakathi nangaphandle kwezwe,” kusho uXaba.

Ngemuva kwesithangami, ithimba labezindaba lithole ithuba lokuhambela iGoodenough Dam eMkhomazi, eliyingxenye yephrojekthi ye-uMkomaas Dam. Lolu hambo beluholwa nguKhulekani Shabalala wakwa-Gibb Engineering.UShabalala ugcizelele ukubaluleka kwedamu, wachaza indima eklanywa ileli damu kule ndawo.