SEKUSEMOME UKUVALWA KOKUNGENELA KWAMA-SIMON MABHUNU SABELA FILM AND TELEVISION AWARDS
UNTANDO Mncube owanqoba kowe-Best actor (Film) nyakenye.
UNOMBULELO Mhlongo owayeqokiwe nyakenye.IZITHOMBE: ZITHUNYELWE
AKHONA DLAMINI
IKWAZULU-Natal Tourism and Film Authority (KZNTAFA), inxusa bonke abakhiqizi bamafilimu, abaqondisi, abalingisi, ababhali, nabanye abasebenza embonini yamafilimu nethelevishini, ukuthi bangaphuthelwa yithuba lokungenela amaSimon Mabhunu Sabela Film and Television Awards (SSA) ka-2026 njengoba ukufakwa kwemisebenzi kuvalwa mhla ziyi-10 kuNtulikazi.
Lesi sikhungo sithe impendulo esesiyitholile ivela kubakhiqizi baKwaZulu-Natal, nakwezinye izingxenye zeNingizimu Afrika iyakhuthaza, kanti kulindeleke ukuthi uhlelo lwalo nyaka lube ngolunye oluzoba nokuncintisana okukhulu emlandweni wale miklomelo. Kuze kube imanje seyiminingana imisebenzi asebethe bayamukela emikhakheni ehlukene okubalwa amafilimu amafushane, amadokhumentari, izinhlelo zethelevishini nemisebenzi yabafundi.
ISikhulu Esiphezulu esibambile se-KZNTAFA, uSibusiso Gumbi, sithe ukwethulwa kwemikhakha emisha eyisishiyagalombili, kuhloswe ngakho ukuhlonipha wonke amakhono adingekayo ekukhiqizweni kwamafilimu nethelevishini.
“Sikhuthazwa yizinga nokwehlukahlukana kwemisebenzi esesiyamukele. Siyabona ukuthi bayanda abakhiqizi abasafufusa nabafundi abangenele, kanti nemikhakha emisha bakhombise ukuyeseka embonini. Le miklomelo ayigcini ngokuhlonipha onqobile kuphela, kepha iphinde ivulele osomabhizinisi nabaculi amathuba amasha, ikhuthaze ukukhula kwemboni futhi iqinise isithunzi saKwaZulu-Natal kwezamafilimu,” kubeka uGumbi.
Owaphumelela kwi -Best Actor (Film) kumaSimon Mabhunu Sabela Awards nyakenye, uNtando Mncube, ukhuthaze bonke abasunguli bemisebenzi ukuthi bangavumeli ukungazethembi kubavimbe ekungeniseni umsebenzi wabo.“ Uma sewuqedile ngomsebenzi oziqhenyayo ngawo, lokho yisizathu esanele sokuwufaka. Awulahlekelwa yilutho ngokungenela, kodwa uthola ukubonakala, ukuqashwa kanye nethuba lokuhlangana nasebemnkantshubomvu endimeni,” kubeka uMncube.
UNombulelo Mhlongo, owayeqokelwe umklomelo weBest Actress (TV) ngonyaka odlule, uthe ukuqokwa kwakhe kwamkhuthaza kakhulu ukuthi aqhubeke nokusebenza kanzima.“Ukuqokwa kumaSimon Mabhunu Sabela Film and Television Awards kwanginika ugqozi lokusebenza ngokuzikhandla kakhulu, kwangikhombisa ukuthi umsebenzi wami uyabonwa futhi uyahlonishwa,” esho.
Umcimbi wokuklomelisa uhlelelwe umhla ziyi-10 kuMfumfu 2026, eThekwini.