LIKHULU ISASASA LOKUBHALISA AMABHIZINISI AMA-SALOON ETHEKWINI

INDAWO yokuzigcwala eseDurban North. ISITHOMBE:Nerina’s hair beauty

NOMCEBO NGEMA

LUYAQHUBEKA nokuba nesasasa uhlelo lukaMasipala weTheku, lokubhalisa amabhizinisi ezindawo zokuzicwala izinwele nobuso (Hair and Beauty Salon). UMasipala uthe ubona indlela abanikazi bezindawo zokuzicwala eThekwini, nasezindaweni ezakhele leli dolobha abaluthakasele ngayo lolu hlelo lokubhalisa amabhizinisi, nokuphuma ngobuningi babo bezoba ingxenye yezigcawu zokufundiswa kabanzi ngawo lawa mabhizinisi.

USihlalo wezokuThuthukiswa koMnotho neKomidi eliHlelayo, uCllr Thembo Ntuli, uthe uMasipala weTheku uyaziqhenya ngesibalo esiphezulu sabanikazi bezindawo zokuzicwala, abavakashela ihhovisi lakwaRegional Business Licensing Offices, bezobhalisa amabhizinisi, kulandela ukufundiswa ngalolu hlobo lwebhizinisi eMlazi nasePinetown.

“Lolu hlelo luyaqhubeka nakuleli sonto KwaMashu, naseThekwini. Sifisa le mboni ikhule indlondlobale. Indlela abanikazi bamabhizinisi okuzicwala abazimisele ngayo, kusho ukuthi bayakubona ukubaluleka kokuba nebhizinisi elisemthethweni. Ukuba nohla lwalabo somabhizinisi kuzokwenza uMasipala wazi ukuthi bangaki, ukuze baweseke ukuze akhule, kudaleke amathuba emisebenzi,” kusho uCllr Ntuli.