ITHEKU LIDALE AMATHUBA EMISEBENZI NGOKUXHASA ABABHAKI
I-THE Bread Army Bakery Co-operative eseZwelibomvu ebhaka izinkwa nokunye okuningi.
IMISHINI uMasipala weTheku axhasa ngayo leli bhizinisi lokubhaka. IZITHOMBE: SANELI MTHALANE
NOMCEBO NGEMA
LUTHELA izithelo ezinhle zokudala amathuba emisebenzi uhlelo lokuxhasa kwababhaki uMasipala weTheku, ngaphansi kohlelo iCommunity Container Bakeries Programme. IBread Army Bakery Co-operative yaseZwelibomvu, yaqalwa abantu ababili bebhakela endlini, manje isikhule yadlondlobala yaqasha abasebenzi abayi-7 ngokugcwele.
Le Bakery inabasebenzi abahambisa umkhiqizo ezindaweni ezahlukahlukene uma usulungile. Leli bhizinisi laxhaswa uMasipala weTheku ngekhontena, ngaphansi kwalo lolu hlelo lokuxhasa ababhaki, olwethulwa ngokusemthethweni ngonyaka ka-2019. Lolu hlelo luhlinzeka ngekhontena enakho konke kubabhaki, ngenhloso yokukhulisa umnotho wendawo, ukudala amathuba emisebenzi, ukwandisa amabhizinisi okudla ezindaweni zasemalokishini nasemakhaya.
UKhaya Nyawo ongomunye womsunguli weBread Army Bakery Co-operative, uthe baqala bebabili besebenzisa isitofu sasekhaya kodwa namuhla selikhulile ibhizinisi. “Sibhaka izinkwa, amakhekhe, sidayisela umphakathi esiwakhele. Sibonga uMasipala weTheku osenze sandlondlobala, kungenxa yoxhaso lukamasipala ngezinsiza kusebenza, izinto zokubhaka, amanzi nogesi. Sifuna ukusabalala singene kwezinye izindawo ukuze kwande amathuba emisebenzi,” kusho uKhaya.
IMeya kaMasipala weTheku uCllr Cyril Xaba, uthe inhloso yalolu uxhaso ukudala amathuba emisebenzi. “Kulolu hlelo uMasipala utshale imali engango-R28 million, wanikeza amabhizinisi okubhaka angama-30 izindawo zokusebenzela, izinsiza kusebenza noqeqesho. Selokhu kwaqala lolu hlelo amabhizinisi asedale amathuba emisebenzi agcwele angama-222 , aqashe abantu bendawo. Ngonyaka wezimali ka-2025/26 amakhontena ayi-6 afakwa eNewlands East, uMlazi kwa-D, eWelbedacht, eMagabheni, eHammarsdale naseShongweni. Sihlele ukufaka amanye amakhontena amathathu kunyaka wezimali u2026/27 KwaNyuswa, Dassenhoek naseNanda ukwandisa amathuba emiphakathini,” kusho iMeya uXaba.
m